Ish-partneri i Gjeorgjia Muratit dhe një shok i tij u paraqitën para gjykatës për akuzat e vrasjes së 41-vjeçares shtatzënë, brenda banesës në Selanik, natën e Vitit të Ri 2024. Trupi i saj u gjet pas një jave në një zonë pyjore pranë Monopigados.
Dy të akuzuarit, njëri 39 dhe tjetri 34 vjeç, po gjykohen për vrasje, ndërprerje të shtatzënisë, grabitje, armëmbajtje pa leje dhe përdorim të saj. Gjatë hyrjes së tyre në sallën e gjyqit, vëllai i viktimës reagoi ndaj të pandehurve, ndërsa policia dhe të afërmit ndërhynë për të qetësuar situatën.
Të afërmit e viktimës, përfshirë babain e saj, kërkuan drejtësi dhe ndalimin e dhunës ndaj grave. Njëkohësisht, në qytet u organizua një tubim solidariteti nga gratë, të cilat protestuan me pankarta dhe parulla kundër dhunës.
Sipas aktakuzës, krimi u krye në banesën e partnerit të viktimës, me qëllim grabitjen e saj. Viktima ishte shtatzënë me fëmijën e partnerit dhe kishte një vajzë tjetër 13-vjeçare. Raporti i mjekësisë ligjore konfirmoi plagë vdekjeprurëse me thikë në qafë. Trupi i viktimës u vendos në një valixhe dhe u transportua në një zonë pyjore.
Pas ngjarjes, 39-vjeçari bëri përpjekje për të çorientuar autoritetet, duke kërkuar publikisht Gjeorgjinë në emisione televizive dhe duke dërguar mesazhe nga telefoni i saj.
