Disa të mitur gjatë natës së kaluar kanë drejtuar një ekskavator në Kapishtec, e kanë vënë në punë dhe kanë shkaktuar dëme në një automjet të parkuar.
Gjithashtu janë shkatërruar kabllot për sistemin e ujitjes dhe janë shkaktuar dëme të konsiderueshme materiale.
Policia ka kryer menjëherë kontrollin dhe po merr të gjitha masat për përcaktimin e përgjegjësisë.
Kryetari i komunës Goran Gerasimovski apelon prindërit që të bisedojnë me fëmijët e tyre për seriozitetin e pasojave të kësaj sjelljeje.
“Të gjithë kufijtë janë kaluar! Është dëmtuar prona publike dhe private. Është cenuar siguria dhe rendi publik. Shkatërrimi i pronës publike dhe private nuk duhet të lejohet. Kjo sjellje duhet të ndalet përpara se të ndodhë diçka më e keqe. Bëj thirrje për vetëdije dhe përgjegjësi”, tha Gerasimovski.
Ky incident vjen pak muaj pas thyerjes dhe vjedhjes së pikës së shërbimeve komunale në Kapishtec, si dhe prishjes së pajisjeve të këndit të lojërave.
Komuna Qendër gjatë verës ka publikuar video incizime të dorëzuara nga qytetarët, në të cilat shfaqen skena të shkatërrimit, tërbimit dhe sjelljeve shqetësuese të të rinjve në një hapësirë publike në të njëjtën lagje.
Më pas kryetari i komunës kërkoi një prani të shtuar të policisë në terren.
Pas incidentit të djeshëm, Gerasimovski rikujton se siguria varet nga angazhimi i përbashkët i qytetarëve, Ministrisë së Punëve të Brendshme dhe vetëqeverisjes lokale.
