Një 16-vjeçar dyshohet se ka shpërndarë materiale personale dhe intime të një të miture përmes rrjeteve sociale dhe aplikacioneve të komunikimit.
Materialet përfshinin fotografi dhe video, të cilat i riu i kishte shpërndarë tek disa persona të ndryshëm, duke shkelur rëndë të drejtat dhe privatësinë e viktimës.
16-vjeçari është ndaluar në Tiranë nga specialistët e Hetimit të Krimeve Kibernetike.
Si provë materiale, është sekuestruar telefoni celular i 16-vjeçarit, ku analizat paraprake kanë zbuluar biseda dhe komunikime që provojnë shpërndarjen e materialeve në platforma të ndryshme. Hetimet po vijojnë për të identifikuar persona të tjerë që mund të jenë përfshirë në këtë veprimtari kriminale.
Materialet hetimore i janë dorëzuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë për veprime të mëtejshme ligjore. I riu akuzohet për veprat penale “Pornografia me të mitur” dhe “Falsifikimi kompjuterik,” të parashikuara nga nenet 117/2 dhe 186/a të Kodit Penal.
