Një zhvillim i fundit ka ndodhur në lidhje me vdekjen e parakohshme të këngëtarit të famshëm, Liam Payne, ish-anëtari i grupit të njohur One Direction.
Mediat e huaja raportojnë se policia në Argjentinë ka ndaluar tre persona dhe ka bastisur një shtëpi.
Sipas ABC World News dhe La Nación, mes të ndaluarve janë dy punonjës hoteli dhe një “mik” i Payne që pretendonte të ishte menaxheri i tij.
Këta të fundit akuzohen për furnizimin e këngëtarit me substancat narkotike që u gjetën në trupin e tij pas rënies nga kati i tretë i hotelit CasaSur Palermo në Buenos Aires, më 16 tetor. Payne ishte 31 vjeç.
La Nación identifikon këtë “mik” si një biznesmen dhe e akuzon për braktisjen e Payne, pasi nuk njoftoi familjen e tij për vështirësitë që po kalonte dhe përdorimin e lëndëve narkotike.
Një raport paraprak toksikologjik i Prokurorisë Kombëtare të Krimeve dhe Korrigjimeve konfirmoi se Payne kishte në sistemin e tij “kokainë rozë,” një përzierje e MDMA, ketaminës dhe metamfetaminës.
Në kuadër të hetimeve, policia kreu gjithashtu një kontroll në dhomën e njërës prej dy grave që thuhet se ishin me Payne para vdekjes. Gjatë këtyre kontrolleve, u sekuestruan nëntë telefona celularë, tre kompjuterë, dy disqe të ngurtë dhe një kavanoz me marihuanë.
Prokurori publik Andrés Madrea konfirmoi për BBC-në se trupi i Payne u iu dërgua familjes më 6 nëntor, pas përfundimit të analizave shtesë toksikologjike dhe laboratorike nga autoritetet vendase.
Pas vdekjes së tij, anëtarët e One Direction publikuan mesazhe prekëse në kujtim të Payne. “Me kalimin e kohës dhe kur të gjithë të jenë të gatshëm, do të ketë më shumë për të thënë,” shkroi grupi. “Por për momentin, do të marrim kohë për të vajtuar dhe për të përpunuar humbjen e vëllait tonë, të cilin e donim pafundësisht. Kujtimet e ndara me të do të jenë të çmuara përgjithmonë. Për tani, mendimet tona janë me familjen e tij, miqtë e tij dhe fansat që e donin së bashku me ne. Na mungon shumë. Të duam, Liam.”
