Donald Trump ka votuar në Florida, pranë rezidencës së tij në Palm Beach, ndërsa kërkon të rikthehet në Shtëpinë e Bardhë. Bashkë me të votoi dhe bashkëshortja e tij, Melania. Duke folur për gazetarët, Trump u shpreh optimist për fitoren, duke thënë se ndjen një “epërsi të madhe” dhe se raportet që ka marrë janë pozitive për ecurinë e tij në këto zgjedhje.
“Ndihem shumë i sigurt. Kam dëgjuar se po ia dalim shumë mirë kudo”, u shpreh Trump.
Në këto zgjedhje, gara me Kamala Harris është e ngushtë, dhe disa mijëra vota në shtetet kyçe si Arizona, Georgia, dhe Pensilvania mund të përcaktojnë rezultatin. Më shumë se 81 milionë amerikanë votuan para kohe, dhe pjesëmarrja pritet të jetë e lartë. Shtëpia e Bardhë dhe Capitol Hill janë të mbrojtura me masa të rrepta sigurie, ndërsa inteligjenca amerikane shpreh shqetësime për ndërhyrje të huaja në votime.
Trump e ka cilësuar këtë ditë si “më të rëndësishmen në historinë amerikane” dhe synon të sigurojë të paktën 270 vota elektorale për të fituar. Nëse fiton, do të bëhej presidenti i parë që ka mbajtur këtë post edhe pasi është shpallur fajtor për një krim, ndërsa një fitore e Harris do të shënonte emërimin e parë të një gruaje me origjinë afrikano-aziatike në krye të vendit.
