Pas kalimit në dy porte të Bashkimit Europian dhe dy të tjera në Afrikë, 102 kontenjerë me mbetje të dyshuara si kancerogjene janë rikthyer në portin e Durrësit, prej nga u nisën më 4 korrik të këtij vitit.
Katër muaj më parë, ngarkesa ishte dërguar në kompaninë “Copper Metal Company Ltd” në Tajlandë, e cila nuk ka kapacitetin për trajtimin e mbetjeve të tilla. Një informacion nga “Basel Action Network” (Rrjeti i Veprimit të Bazelit) ngriti alarmin për përmbajtjen e këtyre mbetjeve.
Mbetjet ishin nisur fillimisht drejt Italisë dhe më pas u ngarkuan në anijet tregtare “Maersk Candor” dhe “Maersk Campton”. Pas një rruge që kaloi nëpër Malta, Marok, Afrikën e Jugut dhe Singapor, ato mendohet se janë përpjekur të shmangin zonat e rrezikshme për piraterinë. Jim Puckett, drejtori ekzekutiv i BAN, tha se anijet fikën fenerët lokalizues pas njoftimit të qeverisë, një veprim i çuditshëm.
Këto mbetje, që dyshohet se përmbajnë pluhur çeliku nga firma turke "Kurum", janë të klasifikuara si mbetje të rrezikshme nga Bashkimi Europian. Ndërkohë, kompania “Kurum” e mohon lidhjen me këtë ngarkesë, ndërsa mbetjet janë blerë nga “Sokolaj”, një kompani që është nën hetim.
Ministritë përkatëse në Shqipëri kanë shprehur qëndrim të qartë kundër rikthimit të këtyre mbetjeve, duke theksuar se nuk mund të pranojnë sasi të tilla pa analiza të plota dhe të besueshme.
Valbona Mazreku, biologe dhe drejtoreshë e “Milieukontakt Albania”, thekson se mbetjet kanë ndotur mjedisin dhe shëndetin përreth. Ajo kërkon që analizat të bëhen nga specialistë të licensuar, me transparencë për publikun.
“Basel Action Network” kërkoi transparencë, por kjo kërkesë është refuzuar nga ministria përkatëse. Hetimet janë shtrirë përtej kufijve shqiptarë, me përfshirjen e OLAF-it, Zyra Anti-Mashtrim e BE-së, e cila po shqyrton dokumentacionin e ngarkesës.
“Direktivat e BE-së po bëhen gjithnjë e më të rrepta për eksportin e mbetjeve në vendet që nuk kanë kapacitete për trajtimin e tyre. Shqipëria duhet të veprojë në përputhje me këto standarde,” përfundon Mazreku.
