Një kamera sigurie mund të ketë regjistruar atentatin që ndodhi pasditen e sotme në Shkodër, ku u ekzekutua vëllai i Ibrahim Licit, Hamza Lici dhe një grua që po kalonte me të shoqin me motor. Të plagosur mbetën Arlind Bushati dhe bashkëshorti i gruas që humbi jetën.
Ngjarja dyshohet të jetë organizuar nga atentatorë që kanë vëzhguar lëvizjet e viktimave, duke i shënjestruar ata si objektiva të sulmit.
Atentatorët përdorën një automjet tip Land Rover dhe qëlluan me breshëri automatike ndaj Licit dhe Bushatit, duke i shkaktuar atij të paktën 30 plumba. Raportet tregojnë se Bushati ka marrë një plumb në kokë, ndërsa Lici ka humbur jetën në vendin e ngjarjes.
Grupi hetimor ende nuk ka identifikuar një pistë lidhur me këtë krim të rëndë, megjithatë janë të njohura përplasjet mes fisit Lici dhe Bajrave, që mund të kenë ndikuar në motivet e atentatit. Investigimi vazhdon për të zbuluar detajet e tjera të ngjarjes.
