Mbrëmja e sotme në "Giuseppe Meazza" solli spektakël në përballjen mes dy gjigantëve të futbollit italian, Inter dhe Juventus.
Në kryesfidën e javës së 9-të të Serie A u shënuan plot tetë gola në një ndeshje emocionuese dhe me intensitet që rrallëherë shihet në Serie A. Ndeshja u mbyll me rezultatin dramatik 4-4. Një përballje e tillë me kaq shumë gola mes dy rivalëve të përjetshëm është një ngjarje historike për tifozët dhe për kampionatin italian.
Ndeshja nisi furishëm, dhe pas 15 minutash lojë Interi kaloi në avantazh përmes një penalltie të realizuar me saktësi nga Zielinski, pas një ndërhyrjeje të gabuar të Danilos. Por Juventusi reagoi menjëherë duke kaluar në avantazh me dy gola të shpejtë brenda 6 minutave nga Vlahovic dhe Ueah, që përmbysën rezultatin në 2-1.
Interi nuk qëndroi i tërhequr. Mhhitaryan në minutën e 35-të dhe Zielinski, sërish nga pika e penalltisë, rikthyen avantazhin për skuadrën zikaltër, duke e mbyllur pjesën e parë me rezultatin 3-2.
Në pjesën e dytë, Interi shtoi presionin dhe realizoi golin e katërt në minutën e 50-të përmes Dumfries. Juventusi nuk e kishte thënë ende fjalën e fundit; zëvendësimet strategjike të trajnerit Motta sollën në lojë Yildiz, i cili shënoi dy gola vendimtarë në minutat 71 dhe 82, duke vulosur rezultatin 4-4 në këtë ndeshje të jashtëzakonshme. Performanca e portierit të Juventusit, Di Gregorio, gjithashtu u shqua, pasi e shpëtoi portën e bardhezinjve në disa raste të rrezikshme të krijuara nga zikaltërit.
Kjo përballje e 239-të mes dy klubeve i shtohet një historie të pasur rivaliteti. Juventusi kryeson statistikat historike me 109 fitore, ndërsa Interi numëron 70 fitore, ndërsa 60 sfida të tjera janë barazime. Fitorja e fundit e Juventusit në "Meazza" daton në 19 mars 2023, me një fitore 0-1, e vlefshme për Serie A. Aktualisht, Interi renditet i dyti në tabelën e kampionatit me 18 pikë, ndërsa Juventusi mban vendin e tretë me 17 pikë.
