Niveli i ujit në liqenin e Fierzës ka pësuar një rënie të ndjeshme, duke alarmuar autoritetet për mungesën e ujërave të freskëta në kaskadën e Drinit.
Shkaktuar nga mungesa e reshjeve dhe prurjet e ulëta nga Drini i Bardhë dhe Drini i Zi, baseni më i madh ujëmbledhës në Shqipëri është në pikën më kritike të viteve të fundit. Aktualisht, prurjet e lumenjve nuk kalojnë 50 metër kubujë në sekondë, dhe niveli i ujit po bie me një ritëm prej 40 cm çdo 24 orë.
Kjo rënie ka ekspozuar bazamentet e dy urave mbi Drinin e Zidhe ka tkurrur rrethimin e kupolës së liqenit. Në mesin e tetorit, niveli i ujit ishte 271.91 metra, por aktualisht është ulur në 269.21 metra – shumë larg kuotës maksimale prej 296.5 metrash që liqeni mund të mbajë. Niveli po i afrohet "pikës së vdekjes" prej 242 metrash mbi nivelin e detit, ku kapaciteti ujëmbajtës reduktohet në 1.2 miliard metër kub ujë, të cilët nuk mund të shfrytëzohen për prodhim energjie.
Në përpjekje për të ruajtur rezervat hidrike, KESH ka ndalur funksionimin e të katër turbinave të hidrocentralit, duke pezulluar përkohësisht prodhimin e energjisë elektrike. Me kapacitet maksimal prej 2.7 miliardë metër kub ujë në kohë normale, liqeni i Fierzës është një burim jetik energjetik për vendin, por aktualisht përballet me një sfidë kritike për mbijetesën e tij.
