Gjatë vitit 2023, gazetaria e pavarur në Shqipëri ka përjetuar sfida të mëdha, përfshirë ndërhyrjet e interesave politike dhe ekonomike në vijën editoriale, si dhe kërcënime fizike dhe ligjore ndaj gazetarëve. Këto përfundime vijnë nga Indeksi i Lirisë së Medias dhe Sigurisë së Gazetarëve, përpiluar nga Safe Journalists Albania, një platformë e mbështetur nga Komisioni Evropian.
Raporti thekson se situata e gazetarëve është përkeqësuar, me një numër të qëndrueshëm sulmesh, përfshirë nëntë sulme ndaj gazetarit dhe mediave. Kushtet e punës janë gjithashtu shqetësuese, me fokus në përqendrimin e pronësisë së mediave, që minon pavarësinë editoriale për shkak të lidhjeve me figura politike.
Indeksi evidenton praktikën e klasifikimit të “shpifjes” si vepër penale, e cila ngarkon gazetarët me rreziqe të mëdha ligjore dhe financiare, me rritje të padive gjatë vitit, përfshirë 65 padi civile dhe 8 penale. Megjithatë, nuk ka pasur dënime me burg për gazetarët.
Pengesat për mbrojtjen e burimeve të informacionit dhe mungesa e transparencës në komunikimet me institucionet janë theksuar si probleme të tjera të rëndësishme. Raporti kritikon qasjen e kufizuar të Bashkisë Tiranë ndaj mediave, duke shmangur interaktivitetin në konferencat për shtyp.
Kushtet e punës janë gjithashtu të vështira, me ankesa për pagat e papaguara dhe orët jashtë orarit. Pasiguria ekonomike ka detyruar gazetaret të hezitojnë të denoncojnë abuzimet. Raporti përmend edhe probleme të pavarësisë editoriale në Radio Televizionin Publik Shqiptar, duke evidentuar njëanshmëri në favor të partisë në pushtet.
Mediat jo-fitimprurëse ofrojnë një përkushtim më të madh për standardet profesionale, por përballen me vështirësi financiare. Raporti apelon për reforma të nevojshme për të përmirësuar situatën e lirisë së medias në Shqipëri.
