Një qytetar ka denoncuar në redaksinë e JOQ Albania një situatë shqetësuese në Shijak, pranë kryqëzimit të Fllakës, ku mbeturinat janë bërë një problem i përditshëm.
Ai ka dërguar një video ku tregon këtë situatë alarmante dhe ndotjen masive, duke përfshirë edhe një bisedë me dy turistë francezë që po kalonin aty me biçikletë, të cilët shprehën pakënaqësitë e tyre.
Sipas qytetarit, ai ka kaluar në këtë zonë për rreth një muaj rresht dhe çdo herë situata duket se po përkeqësohet.
“Çdo ditë shoh turistë që kalojnë aty me maska në fytyrë për shkak të mbeturinave. Sot pyeta dy turistë franceze se çfarë mendonin për këtë situatë dhe ato e cilësuan si një ‘tmerr të vërtetë’. Madje, u shprehën se kjo gjendje është veçanërisht e rrezikshme për fëmijët, pasi vetëm 100 metra larg ndodhet një shkollë”, tha denoncuesi për JOQ Albania.
Turistët theksuan se, pavarësisht peizazheve të bukura të Shqipërisë, është e pabesueshme se si para shtëpive dhe pranë shkollave grumbullohen këto mbeturina. Njëri prej tyre tha: “Kjo është një zonë ku kalojnë fëmijët dhe një rrugë për biçikleta. Është e trishtueshme që pasuria natyrore e vendit tuaj po shkatërrohet nga ndotja.”
Qytetari e përfundon mesazhin e tij me një thirrje për institucionet: “Le ta shohin qeveritarët këtë ndotje dhe të kuptojnë me çfarë shije ikin turistët nga vendi ynë.”
