Një qytetar i revoltuar i ka shkruar redaksisë së JOQ Albania për të denoncuar gjendjen e mjeruar në Thumanë, duke vënë në dukje se, pavarësisht fondeve të mëdha të dedikuara për rindërtimin pas tërmetit tragjik të 26 nëntorit 2019, mbeturinat kanë pushtuar zonën. "Gjithë ato fonde ndërtimi dhe nuk dolën lek për kosha," shkruan qytetari, duke shprehur zhgënjimin me situatën aktuale.
Në këtë zonë ndodhen edhe pesë shtëpi të ndërtuara me paratë e mbledhura nga shqiptarët me zemër të madhe, që kontribuan për të ndihmuar banorët e Thumanës të prekur rëndë nga fatkeqësia. Donacionet e mbledhura nga JOQ Albania iu besuan fondacionit "Firdeus", i cili realizoi ndërtimin e pesë banesave private për të pastrehët. Ndërkohë që këto iniciativa kanë sjellë një ndihmë të vyer për disa familje, mungesa e kujdesit për higjienën dhe infrastrukturën në përgjithësi mbetet një problem i madh për komunitetin lokal.
Banorët kërkojnë që autoritetet të marrin masa të menjëhershme për të përmirësuar kushtet dhe për të siguruar një menaxhim më të mirë të mbetjeve urbane në këtë zonë.
