Detaje të reja janë zbuluar nga aksioni i Policisë Tiranë në 30 qendra estetike, në kuadër të operacionit “Botulinum toxin”, për të goditur rastet e kontrabandimit dhe tregtimit të kundërligjshëm të produktit "Botulinum toxin".
Nga kontrollet dhe verifikimet në këto subjekte rezultoi se administratorët e tyre nuk deklaronin në organet tatimore, të ardhurat që përfitonin nga injektimi i produktit “Botulinum toxin”, te pacientët, pasi produkti dyshohet se është i kundërligjshëm dhe i kontrabanduar.
Deisa Shehaj, ka një CV të larmishme pasi e cilëson veten si stomatologe, teknike qerpikësh dhe estetiste botoxi, ndërkohë që ka qenë Miss dhe është diplomuar për shkenca sociale. Por botox-i që ka injektuar te "kukullat" e Tiranës, që i reklamon edhe në rrjetet sociale, rezulton të ketë qenë i paligjshëm, kontrabandë dhe kësisoj i pakontrolluar.
Botoxi kontrabandë është tejet i rrezikshëm, pasi produktet e paligjshme mund të jenë të falsifikuara ose të një cilësie të dobët, duke mos kaluar testet e sigurisë dhe standardet që kërkohen për tregun zyrtar. Kjo rrit ndjeshëm rrezikun për konsumatorët që mund të përdorin këto produkte, pasi efektet e tyre mund të jenë të paparashikueshme dhe të rrezikshme për shëndetin.
Deri më tani nuk dihet nëse ndonjë nga klientet ka pësuar reaksion nga ky botox, por ajo që mund të thuhet është se Kumaraku si kontrabandues, e ka shpërndarë këtë produkt në shumë klinika dhe qendra të tjera estetike.
Kësisoj, përveç Kumarakut, Mahmutit dhe Shehajt, 5 administratorë të tjerë janë proceduar penalisht, ndërsa 3 janë shpallur në kërkim.
Materialet procedurale janë dorëzuar në Prokurorinë e Tiranës për hetime të mëtejshme.
Njoftimi i policisë:
Gjatë operacionit policor të koduar “Botulinum toxin”, është ushtruar kontroll i autorizuara nga Gjykata e Tiranës dhe janë gjetur në paligjshmëri 30 klinika estetike.
Vihet në pranga Mildon Kumaraku, administratori i subjektit që kontrabandonte dhe magazinonte produktin e kundërligjshëm, si dhe furnizonte me të klinikat. Në pranga dhe administratoret e 2 klinikave Xhuljana Mahmuti dhe Deisa Shehaj.
Si rezultat i veprimeve policore dhe hetimore, të kryera në kuadër të një procedimi penal, të iniciuar për veprat “Kontrabanda me mallra të licencuara”, kryer në bashkëpunim, “Kontrabanda nga punonjësit që lidhen me veprimtarinë doganore”, kryer në bashkëpunim dhe “Fshehja e të ardhurave”, dhe të drejtuar nga Prokuroria e Tiranës, Sektori për Hetimin e Krimit Ekonomik dhe Financiar në Drejtorinë për Hetimin e Krimit Ekonomik dhe Financiar në DPPSh, në bashkëpunim me Drejtorinë për Hetimin e Krimit të Organizuar, Drejtorinë e Forcës së Posaçme Operacionale dhe me Drejtorinë e Hetimit Doganor në Drejtorinë e Përgjithshme të Doganave, finalizoi operacionin policor të koduar “Botulinum toxin”.
Në zbatim të vendimit të Gjykatës së Tiranës, dhënë në kuadër të këtij operacioni, u kryen kontrolle në 30 subjekte private (klinika estetike). Nga kontrollet dhe verifikimet në këto subjekte rezultoi se administratorët e tyre nuk deklaronin në organet tatimore, të ardhurat që përfitonin nga injektimi i produktit “Botulinum toxin”, te pacientët, pasi produkti dyshohet se është i kundërligjshëm dhe i kontrabanduar.
Për këtë paligjshmëri u arrestuan në flagrancë shtetasit Mildon Kumaraku, Xhuljana Mahmuti dhe Deisa Shehaj. Shtetasi Mildon Kumaraku është administrator i një subjekti privat që dyshohet se kontrabandon dhe magazinon produktin e kundërligjshëm, si dhe furnizon me të, klinikat. Ndërkaq, shtetaset Xhuljana Mahmuti dhe Deisa Shehaj janë administratore të 2 prej klinikave ku injektohej ky produkt.
Në vijim të veprimeve procedurale në kuadër të këtij operacioni, nisi procedimi në gjendje të lirë për shtetaset A. T., J. B., J. Z., L. C., K. B. dhe E. Sh, si dhe u shpallën në kërkim shtetasit S. F., K. B. dhe A. F. B., të gjithë adminstratorë klinikash estetike ku injektohej ky produkt. Punohet për kapjen e 3 shtetasve të shpallur në kërkim.
Materialet procedurale shtesë i kaluan Prokurorisë së Tiranës, për hetime të mëtejshme.
