Aktivistja që përpiqet të çrrënjosë kulturën e përdhunimit nëpër shkolla

Ndërsa gjithnjë e më shumë histori përdhunimi seksual në shkollat ​​britanike raportoheshin, platforma u bë virale; universitete të respektuara si Warwick dhe Exeter ishin ndër ato me më shumë raste, duke tërhequr kështu vëmendjen e shtypit britanik. Padyshim që puna e Sarës ka shkaktuar biseda të sikletshme, por të rëndësishme. U ngritën shqetësime se faqja virtuale mund të implikonte në mënyrë të padrejtë djem pa u dhënë atyre të drejtën për të reaguar dhe se shkollat ​​mund të shënjestroheshin pa patur mundësi për të hetuar deklaratat anonime. Madje mendohet se faqja mund të ndikojë negativisht në komunikimin midis djemve dhe vajzave, pasi disa djem kishin frikë se ndërveprimet e tyre me vajzat do të cilësoheshin pa dashje si ngacmim. Për këto akuza Sara përgjigjet: “Duhet të tregojmë ndjeshmëri për të dyja palët dhe të kuptojmë përvojat e njerëzve të ndryshëm”. Ajo është e bindur se ky mirëkuptim duhet të përfshijë të gjithë në mënyrë që gjërat të ndryshojnë vërtet, por ndonjëherë ky mesazh harrohet. Ajo shpjegon se “Everyone’s Invited” nuk synon të shkaktojë një luftë ndërgjinore. “Me të vërtetë doja ta hetoja dhe sfidoja këtë kulturë, dhe të zbuloja shkaqet rrënjësore, me shpresën për të gjetur ndonjë zgjidhje”.

Dy vjet pas krijimit të platformës, Sara “duhej të vazhdonte punën që duhej kryer”. Për këtë arsye, më herët këtë vjeshtë, aktivistja e sapodiplomuar botoi librin e saj të parë Everyone’s Invited. Duke prekur tema që variojnë nga maskuliniteti toksik dhe standardet e bukurisë femërore deri te problemet që rrënojnë industrinë e pornografisë, dhe te naiviteti i prindërve, shkrimet e Sarës nuk lënë gur mbi gur kur bëhet fjalë për shembjen e strukturës patriarkale që, në sytë e saj, ka krijuar një “kulturë përdhunimi” mes të rinjve, një shprehje që i referohet specifikisht mënyrave nënçmuese që djemtë përdorin kur flasin për vajzat si objektivizimi, kritikat ndaj femrave dhe shakatë e rëndomta me përmbajtje të ngacmimit seksual.

Kultura e përdhunimit ka qenë gjithmonë një çështje e diskutueshme dhe Sara i njeh sfidat ekstreme me të cilat përballet, duke qenë një nga imazhet de fakto të lëvizjes. “Të bësh këtë lloj pune është psikologjikisht rraskapitëse; mund të jetë shumë e lodhshme dhe emocionale. Gjithashtu, sulmet vijnë nga një ambient tepër personal, më shpesh nga nënat e djemve. Mund të jetë e vështirë pasi ndihesh shumë e ekspozuar”.

Dokumentarë të tillë si The Hunting Ground i shfaqur në vitin 2015, ku u denoncuan krimet e abuzimit seksual në kampuset e kolegjeve amerikane dhe maskimi i përdorur po nga vetë kolegjet, tregojnë qartë se ky nuk është vetëm një problem i Mbretërisë së Bashkuar. Qasja e lehtë ndaj pornografisë, ndikimi i modeleve ultra-mizogjiniste si Andrew Tate dhe qëndrimi laissez-faire ndaj programeve të edukimit seksual, të gjitha me siguri kontribuojnë në nxitjen e një kulture që nxisin dhunën në kontekstin e intimitetit. Kjo është arsyeja pse “Everyone’s Invited” nisi një program edukativ në vitin 2022 për të ndihmuar shkollat ​​që të sfidojnë kulturën e përdhunimit. Nga trajnimi i stafit deri te seminaret se si të jesh mbështetës aktiv, Soma Sara dhe ekipi i saj janë përkushtuar për të krijuar një botë ku, në fund të fundit, “Everyone’s Invited” të jetë një komunitet pa viktima.