Rikthimi i X (Twitter) në Brazil mund të marrë më shumë kohë pasi miliona dollarë u dërguan gabimisht në bankën e gabuar.
Që kur Elon Musk mori drejtimin, platforma Twitter ose siç njihet tashmë "X", ka kaluar sfida të vështira. Ndryshimet e panevojshme në platformë kanë irrituar përdoruesit, por problemi më i madh është pezullimi i X në të gjithë Brazilin që prej fundit të muajit gushtit.
Platforma u bllokua për shkak të mosrespektimit të urdhrave gjyqësore lidhur me moderimin e gjuhës së urrejtjes dhe për dështimin në emërimin e një përfaqësuesi ligjor në vend, siç kërkohet me ligj.
Brazili është një nga tregjet më të rëndësishme për X, dhe kompania ka tentuar të zgjidhë çështjen që prej atëherë. Sipas një raporti të Reuters, pagesa e gjobave është e vetmja masë e mbetur për të rikthyer platformën.
Më 4 tetor, X bëri një kërkesë të re për të rikthyer shërbimin në Brazil, duke deklaruar se kishte paguar të gjitha gjobat e prapambetura. Por një gabim i madh ndodhi: pagesa u bë në bankën e gabuar.
Gjykatësi i Gjykatës së Lartë, Alexandre de Moraes, kërkoi që pagesa të transferohej në bankën e saktë. Ai vendosi që gjobat prej 28.6 milionë reais (rreth 5.24 milionë dollarë) ishin dërguar në llogarinë e gabuar, duke shtyrë kështu vendimin.
Ekipi ligjor i platformës X e mohoi këtë, duke thënë se gjobat janë paguar në mënyrë të rregullt dhe nuk ka nevojë për ndonjë opinion tjetër nga prokurori i përgjithshëm.
Së fundmi, X mbylli zyrën e tij në Brazil pasi përfaqësuesi i tij u kërcënua me arrest për mosrespektim të urdhrave gjyqësore.
Elon Musk dhe kompania e kanë kritikuar këtë veprim si censurë, duke pretenduar se ishte e paligjshme sipas ligjeve braziliane. Ata gjithashtu kanë akuzuar gjykatësin për anshmëri politike, pasi ai urdhëroi bllokimin e llogarive që përhapnin dezinformata, kryesisht të lidhura me mbështetësit e ish-presidentit Jair Bolsonaro.
Për më tepër, brazilianët që përpiqeshin të aksesonin X përmes VPN përballeshin me gjoba deri në 9,000 dollarë në ditë, më shumë se të ardhurat mesatare vjetore të shumë qytetarëve.
