Siguria në internet është thelbësore në një botë ku krimi kibernetik është në rritje të vazhdueshme.
Një haker dhe ekspert në fushën e sigurisë kibernetike, Joe Cockroft, i cili përdor talentin e tij për mirë, ka zbuluar kombinimet e fjalëkalimeve që duhen shmangur me çdo kusht, për të mbrojtur të dhënat personale dhe paratë tuaja.
Pse është e rëndësishme të keni fjalëkalime të sigurta?
Hyrja e paautorizuar në llogaritë tuaja mund t'ju 'përmbysë jetën' brenda pak minutash, duke përfshirë humbjen e parave nga llogaria bankare, si dhe aksesin në rrjetet tuaja sociale, si Instagram apo Facebook. Në vitin 2024, kostoja vjetore e krimit kibernetik pritet të arrijë deri në 7 milionë paund, me rritje të parashikuara për çdo vit me 15% për dy vitet e ardhshme.
Një nga mënyrat më të thjeshta që hakerët përdorin për të fituar akses në informacionet tuaja financiare apo private është përmes kombinimeve të dobëta të fjalëkalimeve. Përdorimi i fjalëkalimeve të thjeshta si "123456" ose "password" është një rrezik i madh për çdo përdorues.
Cilat janë gabimet që duhen shmangur kur zgjidhni një fjalëkalim?
Sipas Joe Cockroft, nuk duhet të përdorni kurrë informacione të identifikueshme si emrat e anëtarëve të familjes, qytetin ku jetoni ose skuadrën tuaj të preferuar të futbollit. Hakerët shpesh përdorin informacione nga profilet tuaja në rrjetet sociale për të gjurmuar fjalëkalimet.
NordPass zbulon se shumë fjalëkalime popullore janë tepër të thjeshta dhe të lehta për t’u zbuluar. Këshilla kryesore është të mos i përdorni këto kombinime të thjeshta dhe të mos i ndryshoni fjalëkalimet shpesh, përveç nëse dyshoni për një kompromentim të mundshëm.
Mos përdorni të njëjtin fjalëkalim
Përdorimi i të njëjtit fjalëkalim në disa llogari është një nga rreziqet më të mëdha. Nëse një fjalëkalim komprometohet, hakerët mund të kenë akses në të gjitha llogaritë tuaja të tjera. Për këtë arsye, një menaxher fjalëkalimesh është një zgjidhje efektive, duke siguruar që fjalëkalimet të mos ruhen në vende të pasigurta si shënime në telefon apo në shfletues.
Fjalëkalimet që duhet të shmangni
Lista më poshtë, e ofruar nga NordPass, përmban fjalëkalime që hakerët mund t'i zbulojnë brenda sekondash.
Si të mbroni veten në internet
Fjalëkalimet komplekse, me përzierje numrash, simbolesh dhe shkronjash, janë mënyra më e mirë për të mbrojtur informacionet tuaja. Gjithashtu, aktivizimi i autentifikimit me shumë faktorë (MFA), i njohur edhe si 2FA, mund të ndihmojë në verifikimin e identitetit tuaj përmes një kodi të dërguar në pajisjen tuaj mobile. Kjo shton një shtresë të sigurt mbrojtjeje ndaj hakerëve.
