Ekziston një 'test i forcës së kapjes' që mund ta provoni, dhe nëse nuk e kaloni, kjo mund të jetë një shenjë e keqe për mirëqenien tuaj afatgjatë.
Edhe pse tingëllon e çuditshme, eksperti i ushqimit, Ed Jones, e përmendi këtë test dhe tregoi se si mund ta realizoni në shtëpinë tuaj, duke theksuar se ekziston një truk që mund të ndihmojë shëndetin tuaj. Jones ndau atë që kishte mësuar nga Dr. Peter Attia, një specialist i mjekësisë së jetëgjatësisë, i cili zotëron një klinikë private të dedikuar për zgjatjen e jetës së pacientëve.
Jones tha se ky test "nuk përmendet nga mjekët", por mund të nënkuptojë që koha juaj në këtë botë mund të jetë më e shkurtër se sa mendoni.
Gjatë një episodi të "Nutrition World Podcast", eksperti foli për testin e "forcës së kapjes", duke theksuar se: "Nëse nuk mund të mbani një peshë që është 3/4-ta e peshës suaj trupore për një minutë, do të vdisni më shpejt sesa do të ndodhte nëse do të ishit më të fortë. Kjo është më e rëndësishme se kolesteroli apo çdo test gjaku."
Ai shtoi se forca e kapjes mund të tregojë shëndetin e të gjitha sistemeve të trupit tuaj, për aq kohë sa përdorni peshat e duhura. "Një trup më i fortë dhe më rezistent plaket më ngadalë dhe është më pak i prirur ndaj sëmundjeve", tha Jones.
Ky pretendim u mbështet dhe nga mjeku Ardeshir Hashmi, specialist i mjekësisë geriatrike në Cleveland Clinic, i cili tha: "Njerëzit me forcë të mirë të kapjes plaken më ngadalë. Një kapje e fortë mund të ngadalësojë procesin e imunosenescencës, ose rënien e mbrojtjes imunitare që lidhet me plakjen."
Ai shtoi se forca e kapjes ndihmon gjithashtu të përballeni më mirë me sëmundjet dhe parandalon dobësinë fizike.
Dr. Hashmi thekson se një forcë e dobët e kapjes mund të tregojë plakje më të shpejtë ose një rrezik më të lartë për sëmundje kronike, duke e bërë testin e kapjes një tregues të rëndësishëm të shëndetit.
Megjithatë, sipas doktorit, është normale që forca e kapjes të fillojë të bjerë natyrisht rreth moshës 50 vjeç. Ai inkurajon njerëzit të fillojnë ushtrime për forcën e kapjes para kësaj moshe, si shtrydhja e një topi të butë për 10 minuta në ditë.
"Me çdo ushtrim me peshë, duhet të tregoni kujdes që të mos ngarkoni shtyllën kurrizore apo gjunjët. Nuk është e nevojshme të ushtroheni për dy orë çdo ditë," shpjegoi Dr. Hashmi. Ai shtoi: "Hulumtimet tregojnë se 10 minuta ushtrime në ditë mund të bëjnë një ndryshim. Të bëni diçka çdo ditë është më e rëndësishmja."
Përveç kësaj, ai rekomandon një dietë të shëndetshme dhe gjumë të mjaftueshëm për të ruajtur shëndetin tuaj afatgjatë.
