Bashkia Cerrik ka shpallur fituesit e tenderit për projektin "Mbrojtja nga gërryerja dhe përmbytja e fshatit Selitë", faza e parë për njësinë administrative Mollas. Sipas dokumenteve të tenderit, kontrata do të zbatohet nga dy kompani: EN-SAL, në pronësi të Santiliano Hoxha, dhe SIRETA 2F, në pronësi të Fatime Pali. Vlera fituese është 35,732,093 lekë të reja pa TVSH, që përfshihet në rreth 423 milionë lekë të vjetra me TVSH.
Procedura për këtë tender u zhvillua në formë të hapur, nën numrin e referencës REF-17003-08-26-2024. Fondi limit i përcaktuar nga bashkia ishte 36,868,523 lekë të reja pa TVSH, që arrin në rreth 442 milionë lekë të vjetra me TVSH.
Nga të dhënat e bëra publike, në garë morën pjesë gjithsej tre kompani. Njëra nga këto kompani ofroi një çmim rreth 50 milionë lekë të vjetra me TVSH më të ulët se fituesit, por nuk u përzgjodh.
Pavarësisht ofertës më të ulët nga kompania tjetër, fituesi i zgjedhur arriti të siguronte tenderin me një çmim sa 97% e fondit limit të përcaktuar nga bashkia. Ky fakt ka ngritur dyshime mbi procesin e tenderimit, pasi ofertuesi më i ulët nuk u mor parasysh, duke sjellë shqetësime për transparencën e procesit dhe arsyet e përzgjedhjes së kompanive fituese.
Tenderi për fazën e parë të mbrojtjes së fshatit Selitë është një projekt me rëndësi për parandalimin e përmbytjeve në këtë zonë, por dyshimet mbi mënyrën e përzgjedhjes së fituesve kanë nxitur pyetje mbi efektivitetin e menaxhimit të fondeve publike në këtë rast.
