Në një situatë të papranueshme për taksapaguesit, pacientët në urgjencën e Mamurrasit po përballen me kushte skandaloze të infrastrukturës, të cilat janë larg standardeve të pritshme për një shërbim shëndetësor bazik. Fotot e publikuara tregojnë një pamje tronditëse të mureve të dëmtuara nga lagështira, shtretër të amortizuar dhe një mungesë të dukshme të higjienës dhe mirëmbajtjes.
Në pamjet e marra nga brenda ambienteve të urgjencës, siguruar ekskluzivisht për JOQ, vërehen shenja lagështire të përhapura në mure, një lavaman i vjetër e i dëmtuar. Gjendja e keqe e orendive spitalore, përfshirë shtretërit e pacientëve dhe pajisjet mjekësore, është tregues i nivelit të ulët të kujdesit që ofrohet.
Këto pamje ngrejnë shqetësime serioze për shëndetin dhe sigurinë e pacientëve që duhet të trajtohen në këtë qendër. Mungesa e investimeve dhe mirëmbajtjes në sektorin e shëndetësisë po shfaqet qartë në këtë rast, duke lënë qytetarët në një situatë të rënduar dhe të papranueshme.
Autoritetet përkatëse ende nuk kanë dhënë një përgjigje lidhur me gjendjen alarmante të këtij spitali, ndërsa qytetarët kërkojnë veprime të menjëhershme për përmirësimin e kushteve në të cilat ata trajtohen.
