Shkencëtarët britanikë kanë arritur të ruajnë informacionin gjenetik të ADN-së së njeriut në një kristal, që mund të shërbejë për të rikthyer njerëzimin nëse ndonjëherë zhduket. Ekipi i kërkuesve nga Qendra për Kërkime Optoelektronike në Universitetin e Southampton-it ka përdorur lazer për të koduar të dhënat në një kristal të quajtur 5D, i cili sipas tyre mund të qëndrojë i paprekur për miliarda vite.
Ky kristal, ndryshe nga formatet tradicionale të ruajtjes së të dhënave, është shumë më i qëndrueshëm dhe nuk degradon me kalimin e kohës. Në një njoftim për shtyp, universiteti e përshkroi kristalin si një material tejet të qëndrueshëm nga ana kimike dhe termike, që mund t'i rezistojë forcave ekstreme, temperaturave të larta dhe madje rrezatimit kozmik.
Ekipi, i udhëhequr nga profesori Peter Kazansky, përdori një lazer ultra të shpejtë për të regjistruar informacionin që përfaqëson gjenomin e plotë njerëzor – që është seti i plotë i udhëzimeve të ADN-së në një qelizë. Ndryshe nga teknikat klasike të ruajtjes në sipërfaqe dy-dimensionale, kjo metodë përdor dy dimensione optike dhe tre koordinata hapësinore për të ngulitur të dhënat në të gjithë volumin e kristalit, duke e quajtur atë teknologji "5D".
Kjo teknologji mund të përdoret për të ruajtur gjenomet e specieve të rrezikuara nga zhdukja, si bimët dhe kafshët, megjithëse krijimi i organizmave të rinj nga ky informacion ende nuk është i mundur. Profesori Kazansky tha se kjo mund të ndryshojë në të ardhmen, kur shkenca të avancojë mjaftueshëm për të lejuar krijimin e organizmave kompleksë nga të dhënat gjenetike.
Kristali përmban gjithashtu një çelës vizual që ofron informacion mbi përmbajtjen e tij dhe mënyrën se si mund të përdoret nga një inteligjencë e ardhshme për të rikrijuar një organizëm. Ky çelës tregon detaje si përbërësit bazë të jetës, struktura e ADN-së dhe organizimi i gjeneve në një kromozom, të cilët mund të integrohen në një qelizë për të krijuar organizma të gjallë.
Ky kristal është ruajtur në arkivin "Memory of Mankind" brenda një shpelle kripe në Hallstatt të Austrisë, si pjesë e një kapsule kohore që synon të ruajë informacionin për brezat e ardhshëm.
