Propaganda e Bashkisë së Tiranës nën drejtimin e Lali Erit shpesh përqendrohet tek ideja se Tirana po transformohet në një kryeqytet model europian. Megjithatë, faktet tregojnë një realitet krejt tjetër për sa i përket shërbimeve publike.
Një raport i Komisionit Europian për cilësinë e jetës në qytetet europiane zbulon se, nga 83 qytete në gjithë Europën, vetëm 29% e banorëve të Tiranës janë të kënaqur me cilësinë e transportit publik. Kjo e rendit kryeqytetin shqiptar të fundit në Europë.
Ndërkohë, në kryeqytetet veriore dhe perëndimore të Europës, vlerësimi i qytetarëve për transportin publik arrin deri në 91% si në Vjenë, apo edhe mbi 85% në kryeqytetet nordike si Helsinki, Oslo dhe Stokholm.
Pse kjo pakënaqësi e madhe në Tiranë? Ndonëse Bashkia e Tiranës, nën udhëheqjen e Lali Erit, propagandon përmirësime në infrastrukturë dhe shërbime, qytetarët duket se nuk ndihen të kënaqur me transportin publik. Në fakt, shifrat tregojnë se pjesa dërrmuese e banorëve të Tiranës janë të pakënaqur me sigurinë dhe besueshmërinë e shërbimit të transportit, faktorë të cilët kanë një ndikim të drejtpërdrejtë në perceptimin e përgjithshëm.
Ironikisht, ndonëse çmimi i biletave mund të jetë relativisht i përballueshëm, ky nuk është tregues i mjaftueshëm për të rritur kënaqësinë e qytetarëve. Përkundrazi, përmirësimi i sigurisë, qasjes, besueshmërisë dhe frekuencës së autobusëve përbëjnë thelbin e rritjes së kënaqësisë, siç tregojnë të dhënat e raportit europian.
Në Tiranë, transporti publik është bërë jo vetëm burim pakënaqësie për qytetarët, por gjithashtu autobusët urbanë janë përfshirë edhe në disa aksidente dhe incidente të ndryshme, duke ngritur shqetësime për sigurinë dhe efektivitetin e shërbimit.
