Tensionet mes Izraelit dhe Hezbollahut sa vijnë dhe përshkallëzohen, teksa Izraeli ka ndërmarrë të tjera sulme ajrore së fundmi duke goditur objektivat ushtarakë të Hezbollahut në Liban.
Në një dalje televizive, kreu i Hezbollah-ut, Hassan Nasrallah, akuzoi Izraelin për shpërthimet e biperave që ndodhën këtë javë, duke deklaruar se këto shpërthime që shkaktuan të paktën 37 viktima, kanë shkelur të gjitha "vijat e kuqe." Ai premtoi një përgjigje të ashpër nga organizata e tij kundër Izraelit.
Ndërkohë që Nasrallah fliste, korrespondenti i BBC-së për Lindjen e Mesme, Hugo Bachega, raportoi se kishte dëgjuar shpërthime të mëdha ndërsa avionët izraelitë fluturonin mbi kryeqytetin libanez, Bejrut.
Më pas Izraeli njoftoi zyrtarisht se kishte nisur sulme të reja ndaj infrastrukturës së Hezbollahut në Liban. Ministri i Mbrojtjes i Izraelit, Yoav Gallant, deklaroi se veprimet kundër Hezbollahut do të vazhdojnë, por pranoi se ekzistojnë "rreziqe të konsiderueshme" në këtë fazë të re të konfliktit.
Më 17 Shtator 2024, mijëra pajisje biper që përdoren nga Hezbollah në Liban dhe Siri shpërthyen njëkohësisht, duke shkaktuar një prej rrjedhjeve më të mëdha të sigurisë për organizatën që nga fillimi i konfliktit. Sipas raportimeve në media, mendohet se shërbimet e inteligjencës izraelite kishin kapur dërgesat e pajisjeve dhe i kishin mbushur me material shpërthyes. Shpërthimi i parë ndodhi në orën 15:30 me orën lokale, duke vrarë 12 persona dhe duke plagosur mbi 2,750 të tjerë.
Një valë e dytë shpërthimesh goditi radion komunikuese të njohur si ICOM të nesërmen, duke vrarë të paktën 25 persona dhe duke plagosur 708 të tjerë. Shpërthime të tjera u raportuan edhe në pajisje të tjera elektronike, por nuk është konfirmuar ende nëse ato shpërthyen në mënyrë të pavarur apo si rezultat i shpërthimeve të tjera.
