Dominique Pelicot, ka pranuar në seancën Gjyqësore se ka droguar gruan në mënyrë që ta abuzonin dhjetëra burra për më shumë se 10 vjet.
Duke iu referuar 50 të bashkëpandehurve që akuzohen për përdhunimin e ish-gruas së tij Gisèle, 71-vjeçari tha: “Jam përdhunues si të tjerët në këtë dhomë”. “Ata të gjithë e dinin, nuk mund ta mohojnë”, shtoi. Mandej, për ish-gruan u shpreh se ajo nuk e meritonte këtë, ndërsa u shpreh se ishte shumë i lumtur me të.
“E kam të vështirë t’i dëgjoj këto fjalë. Kam kaluar 50 vjet me një njeri që nuk do të kisha imagjinuar kurrë se do të ishte i aftë për diçka të tillë. I kam besuar verbërisht”, tha Gisèle menjëherë.
Edhe pse nuk lejohen kamera në gjykatë, gjyqi është i hapur për publikun me kërkesë të Gisèle Pelicot, e cila hoqi dorë nga e drejta e saj për anonimitet në fillim të procesit. Ekipi ligjor i Pelicot tha se hapja e gjyqit do ta rikthente “turpin” tek të akuzuarit.
Pelicot, i cili është baba dhe gjysh, nisi dëshminë duke treguar për përvojat traumatike nga fëmijëria dhe duke zbuluar se ishte abuzuar nga një infermier kur ishte nëntë vjeç.
Kur u pyet për martesën e tij me Gisèle, ai tha se kishte menduar të vetëvritej kur zbuloi lidhjen e saj me dikë tjetër dhe s’e donte ta përplaste makinën te pemët, por nuk kishte pasur guximin.
“Ndoshta duhej ta kisha bërë”, tha ai.
Në dëshminë e tij, theksonte vazhdimisht se nuk e urrente gruan e tij, por ishte i çmendur pas saj.
“E doja mirë për 40 vjet dhe keq për 10”, duke iu referuar periudhës kur kishte një marrëdhënie të shëndetshme dhe të dashur me Gisèle për 40 vjet, dhe periudhës 10-vjeçare gjatë së cilës kishte abuzuar dhe droguar atë.
Gjithashtu, u pyet edhe për videot e shumta ku duket gruaja e tij pa ndjenja duke u abuzuar nga 50 burra. Ai u shpreh se filmimet ishin pjesërisht për kënaqësi por edhe për prova, pasi sot falë videove mund të identifikohen autorët.
Kur Stéphane Babonneau, një nga avokatët e Gisèle e pyeti Pelicot pse nuk ndaloi abuzimin kur ajo filloi të kishte probleme mjekësore që ishin efekte anësore të barnave që ai ia kishte dhënë asaj, ai u shpreh se varësia e tij ishte më e fortë se arsyeja.
Nga ana tjetër, Pelicot akuzohet se ka droguar dhe abuzuar të bijën, Caroline, pasi në laptopin e tij u gjetën fotot ku ajo ishte gjysmë e zhveshur.
Ai e ka hedhur poshtë këtë akuzë dhe ka deklaruar se nuk i ka prekur kurrë nipërit e tij.
Béatrice Zavarro, avokatja e Pelicot, tha se nuk ishte e sigurt se çfarë do të mendonin njerëzit për klientin e saj, por theksoi se ai “po thoshte të vërtetën”. Gjithashtu, shtoi se Pelicot ishte “në gjendje të rënduar psikologjike” dhe nënvizoi: “Ne do të arrijmë në fund të këtij gjyqi dhe do të dimë gjithçka për Dominique Pelicot”.
Pelicot, i cili është diagnostikuar me një infeksion në veshka dhe gurë në veshka, mungoi në gjykatë për gati një javë për shkak të sëmundjes. Ai është planifikuar të japë dëshminë e tij gjatë gjithë ditës, megjithëse do të ketë pushime të shpeshta për shkak të gjendjes së tij shëndetësore.
