Një qytetar nga Durrësi ka denoncuar pranë redaksisë së JOQ Albania një situatë shqetësuese që po ndodh në zonën e njohur si "Lulishtja", pranë Muzeut të Dëshmorëve.
Në videon e dërguar, shihen qartë një tufë qensh endacakë, të cilët po lëvizin dhe lehin në këtë zonë shumë të frekuentuar të qytetit bregdetar, ku ndodhen disa bar-kafe dhe restorante.
Po ashtu në këtë zonë ka dhe shumë fëmijë të pranishëm të cilët luajnë në lulishten përreth.
Banorët e zonës dhe vizitorët e shumtë që frekuentojnë kafenetë dhe hapësirën e gjelbër përreth, kanë ngritur alarmin për rrezikun që mund të paraqesin këta qen, sidomos për fëmijët që luajnë aty çdo ditë.
Prania e një numri të madh qenve endacakë ngre shqetësime për sigurinë dhe qetësinë e qytetarëve, të cilët ndihen të kërcënuar nga mundësia e ndonjë sulmi të papritur.
Qytetarët kërkojnë ndërhyrjen urgjente të Bashkisë Durrës për të zgjidhur këtë problem, duke gjetur një mënyrë për menaxhimin e qenve endacakë në mënyrë që të mbrohet siguria publike dhe të garantohet një ambient i sigurt për të gjithë frekuentuesit e zonës.
