Në ndeshjen e së dielës në Girona, Lamine Yamal përforcoi arsyet pse është një nga talentet më të mëdhenj të futbollit. Me tre gola dhe katër asistime këtë sezon, shifrat e tij janë të jashtëzakonshme dhe e konfirmojnë ndikimin e tij të menjëhershëm në lojë.
Barcelona e ka të qartë këtë dhe se kontrata e tij (pavarësisht se është 17 vjeç), tashmë është vjetruar. Nënshkrimi i kontratës së re u bë më 2 tetor 2023, duke u bërë lojtari referues i Barcelonës.
Kjo është arsyeja pse klubi i ka idetë e qarta në lidhje me lojtarin. Gjatë gjithë këtij sezoni, klubi do të përmirësojë kushtet e tij financiare, sepse tani po fiton mbi një milion e gjysmë euro në vit. Megjithëse, Lamine Yamal ka marrë një bonus nga Barcelona për arritjet e tij sezonin e kaluar, prapëseprapë nuk është i mjaftueshëm për të reflektuar vlerën dhe cilësinë e lartë që ai ka treguar në fushë.
Gjithashtu, planifikohet që Yamal të nënshkruajë një kontratë profesionale kur të mbushë 18 vjeç, deri në vitin 2030. Në këtë kontratë të re, do të ofrohen kushte ekonomike që të pasqyrojnë vlerën e tij të lartë dhe performancën që ofron. Me pak fjalë, një rrogë mjaft të lartë!
Kujtojmë se sezonin e kaluar, siç raportoi MARCA, PSG-ja ishte e gatshme të paguante 200 milionë për transferimin e futbollistit. Madje kjo shifër u rrit në fund të sezonit. Megjithatë, Barcelona nuk ka ndër mend ta lëshojë Yamalin dhe nuk do të pranojë oferta për të. Klubi spanjoll e ka bërë të qartë qëndrimin e tij dhe ka konfirmuar se Yamal është një pjesë e rëndësishme e të ardhmes së klubit.
Menaxhmenti sportiv i Barcelonës ka një plan strategjik për të ndërtuar një ekip të fortë për të ardhmen duke u mbështetur në talentet e reja që po dalin nga akademia e klubit, La Masía. Lamine Yamal është planifikuar të jetë një figurë udhëheqëse në këtë strategji dhe një model për lojtarët e tjerë të rinj që do të zhvillohen në klub.
Klubi synon të mbrojë dhe të ruajë Yamalin, dhe pastaj të ndjekë të njëjtën politikë për të mbrojtur dhe zhvilluar edhe lojtarë të tjerë të rinj si Cubarsí, Fermín dhe Gavi. Qëllimi është të krijohet një bazë e fortë me lojtarë të rinj të talentuar që mund të kontribuojnë në suksesin afatgjatë të klubit.
