Skandal në Kinostudio/ Ujërat e zeza dalin sheshit, Bashkia e Lalit injoron prej javësh ankesat e banorëve

Një qytetare nga Tirana ka denoncuar në redaksinë e JOQ Albania një situatë alarmante që po zgjat prej disa javësh në lagjen "Pjetër Dungu", në Kinostudio.

Sipas denoncueses, rrjeti i grumbullimit të ujërave të zeza në këtë zonë është i hapur dhe i ekspozuar, duke krijuar një ambient të tmerrshëm dhe të pabanueshëm për banorët, për shkak të erës së rëndë që vjen nga kanalizimet e hapura.

Ajo shprehet se banorët e zonës prej javësh e kanë denoncuar problematikën në Bashkinë e Tiranës me shkrim dhe duke ndjekur të gjitha procedurat e nevojshme zyrtare, por asnjë masë nuk është ndërmarrë deri më tani, edhe pse kanë kaluar disa javë.

Banorët e lagjes janë të lodhur nga mosveprimi i institucioneve dhe kërkojnë ndërhyrje urgjente për të zgjidhur këtë problem që po rrezikon shëndetin e tyre dhe cilësinë e jetës në zonë.

Denoncimi është shoqëruar me foto si prova që dëshmojnë qartazi seriozitetin e situatës.

Bashkia e Tiranës ende nuk ka reaguar ndaj këtij problemi, pavarësisht kërkesave të përsëritura të banorëve.

Denoncimi i plotë i qytetares:

Përshëndetje JOQ kam një ankesë prej javësh, këtu ne Lagjen Pjeter Dungu Kinostudio Tiran është lidhje me Ujsells Kanallizimet të cilat janë të hapurane në shesh i gjith Rrjeti i Grumbullimit i Ujërave të Zeza. Unë isha në Bashki dhe u ankova dhe banorët e tjerë po ashtu . Por prap se prap nuk ka ndodhur asgjë për javë të tëra deri sot. Vendndodhja është e tmerrshme dhe e pabanueshme për shkak të erës. Fatkeqësisht, Bashkis te Tiranes nuk i intereson. Jemi ankuar në bashki të gjithë si lagje për javë të tëra duke i ndjekur me shkrim dhe duke ndjek te gjitha procedurat. Jo më larg se dje u ankova prapë, por asnjë masë nuk është marrë. Do të isha mirënjohës nëse do ta publikonit këtë dhe ju lutem anonym 🙏 shikoni fotot si provë Me gjith Respektin Falminderit per kohen