Pas disa ditësh protesta të vazhdueshme, banorët e Krujës dhe zonave përreth kanë arritur një fitore të rëndësishme në përballjen e tyre me qeverinë, duke fituar të drejtën e tyre.
Përpjekjet e tyre për të kërkuar nyje lidhëse në rrugën e re Thumanë-Kashar kanë rezultuar në një sukses të plotë. Protesta e tyre nisi për shkak të mungesës së nyjeve lidhëse mes rrugës së re dhe asaj të vjetër duke penalizuar rreth 85 mijë banorë të zonës.
Banorët nuk pranuan të dorëzohen përballë indiferencës fillestare të institucioneve dhe këmbëngulën në të drejtën e tyre për lëvizje të lirë. Ky presion i vazhdueshëm banorët rezultoi në tërheqjen e qeverisë dhe pranimin e kërkesave të tyre.
Pas këtyre protestave, Ministrja e Infrastrukturës, Belinda Balluku, pranoi të ndërhyjë për të siguruar akses në rrugën e re për banorët e zonës.
Kjo fitore dëshmon se kur qytetarët bashkohen dhe kërkojnë të drejtat e tyre në mënyrë të organizuar, ndryshimet mund të ndodhin, duke i detyruar autoritetet të veprojnë në interesin e popullit.
Lajmi është dhënë nga Sabah Sheta, një nga organizatorët e protestave dhe banor i Krujës, i cili njoftoi në rrjetet sociale se pas presionit publik dhe angazhimit të qytetarëve, qeveria është tërhequr.
Postimi i plotë i Shetës:
E drejta vonon, por triumfon. Qeveria tërhiqet, krutanët do të ketë hyrje dhe dalje në aksin e rruges Thumanë-Kashar
Sot është një ditë e shënuar për banorët e Bashkisë Krujë. E tillë u kthye fal bashkërezistencës me vëllezërit të mi nga Kruja, Fushë -Kruja Nikla, Cudhia, Bubqi dhe Thumana. Pas një takimi që patëm si përfaqësi e qytetarëve të Krujës me zv.kryeministren dhe ministren e Transporteve Belinda Balluku prej saj në emër të qeverisë u pranua kërkesa jonë e drejtë dhe legjitime për të patur akses në rrugën Thumanë-Kashar. U bë e mundur që qeveria shqiptare të tërhiqet nga izolimi që i bënë mijëra bizneseve dhe 85 mijë banorëve të Krujës. Motra dhe vëllezër krutanë! Kjo nuk është lëmoshë dhe dhuratë për ne. Është një e drejtë e mohuar nga ekzekutivi, por tashmë e fituar dhe pse me vonesë, por që ishin protestat tona sistematike, rezistenca jonë, premtimi që i bëmë njëri-tjetrin për të mos bërë asnjë hap pas, ajo që na mundësoi uljen në tavolinë sot me znj.Balluku, prej së cilës morëm premtimin që qytetarëve të Bashkisë Krujë do tu kthehet ajo që kishin; akesin (hyrje dhe dalje) në rrugën e re Thumanë-Kashar. Veç falënderimit për secilin që na jeni bashkuar në çdo protestë, kam një mirënjohje për atë çfarë bëtë duke lënë punët tuaja të përditshme për të iu bashkuar kësaj kauze. Të nderuar vëllezër! Pa ju nuk do ta kishim të mundur të korrnim këtë fitore. NE e kishim bërë të qartë që nuk do të tërhiqeshim, ata e dëgjuan me zë dhe figurë, e panë përmes akteve tona, ndaj sot ishte ministrja e Transporteve Balluku që “vrau” indiferencën duke i kushtuar vëmendje këtij problemi që për në shkaktonte kosto sociale dhe ekonomike sepse Kruja është dhe një zonë turistike dhe historike. Duke vlerësuar premtimin dhe vendimin e Ministrisë së Transporteve për t’u tërhequr nga qëndrimi fillestar dhe kokëfortë i tyre dhe dhënien e zgjidhjes, duke iu dhënë qytetarëve të Krujës mundësinë të hynë dhe dalin në aksin e rrugës Thumanë-Kashar, nuk na mbetet gjë tjetër veçse ta përshëndesim këtë qëndrim dhe pse të vonuar, por ndërkohë do ta monitorojmë zbatimin e tij. Vëllezër edhe njëherë FALEMINDERIT dhe MIRËNJOHJE për secilin! BASHKË ia DOLËM!
