Pa pikë dyshimi , të gjithë personat e përfshirë në vrasjen e Egli Progës në Pogradec, janë haramët e muajit, pasi Egli nuk u vra vetëm nga grushtet e Denis Meçes, por nga të gjitha veprimet e të tjerëve më sipër që tentuan të fshehin të vërtetën.
Haram është shefi i komisariatit Elton Halili, që e quajti vrasjen e Eglit si vdekjen e një të dehuri që rrëzohet në rrugë, haram është Voltan Shulku, pronari i një biznesi në Pogradec që fshiu kamerat pas ngjarjes, haram është prokurorja Vasjana Postol, e cila e quajti vrasjen e Eglit vrasje nga pakujdesia, haram është edhe gjyqtarja Luljeta Kole, e cila e vulosi si vrasje nga pakujdesia ekzekutimin e 42-vjeçarit, babai i dy fëmijëve.
Megjithatë, sot haramët e këtij muaji janë të lumtur, pasi kryeministri Edi Rama, i mori në mbrojtje, pothuajse të gjithë personat e sipërpërmendur.
Edi Rama i bëri një analizë të veçantë vrasjes së Eglit, duke quajtur gënjeshtra shumë të vërteta, që nuk duan syze të veçanta të shikohen. Ai e serviri vrasjen e Eglit si një ngjarje që u përdor nga politika, për të sulmuar qeverinë, e pavërtetë, por të gjithë e dinë se ngjarja u tentua të fshihej, për sakrificat që Denis Meçe dhe njerëz si ai kanë bërë për Partinë Socialiste, duke e sjellë në pushtet."
Kryeministri me fjalimin e tij, dashje pa dashje, 'mori në mbrojtje' haramët e muajit, të cilët i kanë duart e lyera me gjak. Ai u ndal aq shumë në këtë ngjarje, sepse e di që ka të vërteta që dhembin, por elektorati duhet t’i shtrohet një tjetër anë e historisë, sa për votat, të cilat do sigurohen nga njerëz si Denis Meçe.
“U mobilizuan ta përdorin vrasjen e një djali të ri si overdozë helmi për të nxitur urrejtjen ndaj nesh. U prodhuar një film i kronikës së zezë ku u mblodhën bashkë të tëra të këqijat e mundshme. Komunikata e policisë u hodh në cepat e lajmeve dhe komenteve mediatike, që i dominoi fantazia kriminale e gënjeshtareve dhe gjuha ekstremiste e spekulantëve. U tha me të madhe se vrasja kishte ardhur për një gjobë të papaguar, për të cilën viktima u vra nga një bandë gjobitësish. Gënjeshtër. U shkrua që Pogradeci qenka vërë si qeli e viteve ‘80 ku ligjin e bëkan bandat e gjobëvnëse, gënjeshtër.
U vu kuja se policia kishte tentuar ta fshihte krimin, gënjeshtër. Shpejtësia veprimeve të policisë në ndalimin e autorit është e dokumentuar. U bërtit se ambulanca kishte ardhur me 40 minuta vonesë, gënjeshtër. Koha e mbërritjes është e dokumentuar në sistem. U përhap se autori i krimit kishte mbrojtje politike, ngaqë një dajë i tij ishte eksponent i lartë i PS në Pogradec. Gënjeshtër.” – tha Rama.
