Zbardhet dinamika e atentatit në “Don Bosko” ku u plagosën dy persona.
Kastriot Elezi 45 vjeç dhe Renaldo Metushi 22 vjeç, të cilët kanë shoqëri mes tyre, po pinin kafe jashtë lokalit kur u afrua makina tip “Volkswagen Golf 5” dhe nga brenda saj qëlluan 7 herë, duke plagosur në gjoks e krah 45-vjeçarin dhe në këmbë 22-vjeçarin.
Autorët u larguan menjëherë dhe makina u gjet e djegur në zonën e Institutit, në Tiranë dhe brenda saj u gjet arma e zjarrit, që dyshohet e përdorur në atentat.
Makina ka targa të rregullta, mirëpo i është ndryshuar numri i shasisë.
Bazuar në hetimet e policisë, dyshohet se në atentat janë përfshirë 3 persona, njëri ka qëlluar, një tjetër ka qenë për mbështetje dhe shoferi.
Ndërkohë, kamerat e sigurisë së lokalit dhe të zonës përreth kanë kapur të gjithë dinamikën e atentatit.
Ndërkohë vazhdojnë hetimet dhe pritet që dëshmitë e të plagosurve të hedhin më shumë dritë mbi ngjarjen.
“Kemi ngritur një grup të posaçëm hetimor që po mbledh të gjitha provat që do ti shërbejnë hetimit. Jemi duke kontrolluar në të gjithë zonat për kamerat e sigurisë. Po kështu, në territorin e komisariati numër 5 është gjetur një mjet, që ka përputhshmëri me atë të autorëve. Targat nuk janë të vjedhura, por numri i shasisë nuk përputhet me automjetin origjinal. Vazhdojnë hetimet. Janë sekuestruar 7 gëzhoja nga një armë zjarri, nuk e kemi përcaktuar tipin e armës. Në automjet është gjetur një armë zjarri që po ekzaminohen. Ishin në të njëjtën tavolinë, janë lidhje shoqërore. Nuk është kamarier. Kanë qenë duke pirë kafe në verandën e lokalit. Për objektivin nuk mund ta themi, nga hetimi besoj se do të rezultojë.
Mendohet se kanë qenë tre persona, përfshirë dhe drejtuesin e mjetit. Jemi duke analizuar çështjen, njëri prej tyre ka precedent kriminal. Jemi duke hetuar backgroundin e të plagosurve, për të përcaktuar dhe pistat hetimore. Autorët kanë qëlluar nga automjeti, nuk kanë zbritur. Kemi pamjet filmike dhe kemi një ide të qartë për dinamikën”, tha Vocaj.
Pavarësisht qëndrimeve të Vocajt, dyshimet janë se shënjestër e atentati ka qenë 45-vjeçari Elezi. Ai rezulton me rekorde kriminale, i dënuar në Itali për prostitucion dhe trafiqe droge. Po ashtu dyshohet se autorët kanë qenë vrasës me pagesë. Policia po vijon hetimet dhe do jenë dëshmitë e të plagosurve që do hedhin më shumë dritë”, tha kreu i Policisë së Tiranës.
