Serbët në veriun e Kosovës kanë paralajmëruar se do të rikthejnë barrikadat këtë fundjavë në veri!
Ky reagim vjen si kundërpërgjigje ndaj vendimit të autoriteteve të Kosovës për të mbyllur pesë zyra që vepronin si struktura paralele.
Rasha Rojeviç, kryetari i vetëshpallur i Asociacionit të banorëve të Qarkut të Mitrovicës, deklaroi se të premten do të nisë bllokada e të gjitha kalimeve kufitare në Kosovë. Ai shtoi se barrikadat do të qëndrojnë derisa policia e Kosovës të tërhiqet dhe institucionet të kthehen në duart e serbëve.
“Bllokada do të fillojë të premten dhe do të vazhdojë derisa forcat policore të Kosovës të tërhiqen nga veriu i Kosovës dhe institucionet e uzurpuara t'u kthehen serbëve. Ne gjithashtu kërkojmë që KFOR-i, në përputhje me mandatin e Rezolutës 1244, të marrë kontrollin e veriut të Kosovës,”-deklaroi Rojeviç.
Rojeviç tha se bllokada do të mbështetet nga qytetarët nga Serbia qendrore, Mali i Zi dhe Republika Srpska, për të mbrojtur serbët që jetojnë në Kosovë nga një hakmarrje e mundshme nga Policia e Kosovës.
Ai pretendoi se nuk do të kërkojnë ndihmë nga shteti dhe se nuk kanë nevojë për të. “Nuk presim ndihmë nga shteti dhe as nuk kemi nevojë për të. Serbët që jetojnë në Kosovë nuk do të marrin pjesë në bllokada për të mos u ngacmuar nga policia e Kosovës, por vetëm qytetarët nga territori i Serbisë qendrore, Mali i Zi dhe Republika Srpska,”-shtoi Rojeviç.
Ai gjithashtu tha se do të sigurohet transport për të gjithë pjesëmarrësit e interesuar nga Beogradi, Novi Sadi, Smedereva, Kragujevaci, Nishi, Krushevci, Vranja dhe Rashka, dhe se automjetet spitalore do të lejohen të kalojnë gjatë bllokadës.
Në dritën e mbylljes së pesë institucioneve paralele serbe në veri nga autoritetet e Kosovës, rreth 300 qytetarë serbë u mblodhën sot para një objekti që më herët përdorej nga komuna paralele serbe në Mitrovicën e Veriut.
Vendimi i qeverisë së Kosovës u kritikua nga Shtetet e Bashkuara dhe Bashkimi Evropian, të cilët e cilësuan atë si të pakoordinuar dhe të njëanshëm.
Aksioni i 30 gushtit, i kryer nga institucionet e Kosovës, u cilësua si një veprim i njëanshëm dhe i pakoordinuar nga bashkësia ndërkombëtare dhe u kundërshtua gjithashtu nga Lista Serbe, partia kryesore e serbëve lokalë në Kosovë që mbështetet nga Beogradi dhe zyrtarët në Serbi.
