Në një zhvillim të fundit, JOQ ka siguruar prova që dëshmojnë se Qeveria dhe Ministria e Mjedisit, drejtuar nga Mirela Kumbaro, janë të mirëinformuara mbi transportin e mbetjeve të rrezikshme të Kurum.
Një dokument zyrtar tregon se licenca e kompanisë "Sokolaj Shpk" është autorizuar nga vetë ministrja Kumbaro më datë 20 prill 2022. Kjo licencë i lejon kompanisë të transportojë mbetje të rrezikshme, duke ngritur pikëpyetje mbi sigurinë dhe menaxhimin e këtij procesi.
Dokumenti i firmosur nga Kumbaro vërteton se autoritetet janë të vetëdijshme për aktivitetet e transportit të mbetjeve të rrezikshme, duke shtuar një dimension të ri në debatet mbi transparencën dhe përgjegjshmërinë e institucioneve publike në këtë fushë.
Kompania e drejtuar nga Gjovana Sokolaj, "Sokolaj Shpk," i ka blerë këto mbetje të rrezikshme nga Kurum dhe më pas ia ka shitur ato një kompanie tjetër në pronësi të saj në Kroaci. Marrësi i këtyre ngarkesave është "GS Minerals D.o.o," e regjistruar në Rijeka, Kroaci.
Transaksioni financiar tregon se "Sokolaj" i bleu mbetjet për 41 mijë USD nga Kurum dhe ia shiti vetes përmes kompanisë kroate për 141 mijë USD.
Kontejnerët me mbetje të rrezikshme u nisën nga porti i Durrësit me destinacionin fundor Tajlandën më 4 korrik 2024.
“…më informon se 102 kontejnerët që kompania ime kishte nisur do të kthehen në portin e Durrësit, sepse porti i Singaporit nuk pranon të bëjë shkarkimin, pasi kanë dyshime se janë mbushur me lëndë toksike,” ka deklaruar Sokolaj.
“Unë i kam kthyer email dhe i kam thënë që për mallin e ngarkuar në kontenjerë, që është oksid hekuri, janë bërë analizat nga Sokolaj sh.p.k dhe Kurum sh.a dhe nuk rezulton që aty të ketë mbetje toksike,” ka pretenduar ajo.
Të dhënat publike të shqyrtuara nga BIRN tregojnë se kompania kroate e drejtuar nga Gjovana Sokolaj, “GS Minerals D.o.o,” reklamon hapur në internet tregtinë e saj me mbetje të rrezikshme EAFD dhe okside të zinkut.
Në një prej reklamave, kompania deklaron se ka të gatshëm në portin e Durrësit koncentrate zinku të gradës së ulët dhe ofron për shitje pluhur hiri EAFD. Këto reklama tregojnë qartë përfshirjen e kompanisë në tregtinë e mbetjeve të rrezikshme.
