Kirurgjia plastike, e cila dikur ishte ‘ekskluzivitet” për të pasurit dhe të famshmit, është bërë më e arritshme për njerëzit e tjerë në Shqipëri. Kjo tendencë është shoqëruar edhe me një rritje të ndjeshme të procedurave estetike të cilat po ndahen hapur në mediat sociale, duke thyer tabutë dhe stigmat që i rrethonin dikur këto ndërhyrje.
Sipas drejtuesve të klinikave të njohura estetike në Shqipëri, rinoplastika, ose rimodelimi i hundës, mbetet ndërhyrja më e kërkuar nga shqiptarët, si nga femrat ashtu edhe nga meshkujt. Klinikat raportojnë se rreth 80% e operacioneve estetike përqendrohen pikërisht në këtë procedurë.
“Në vend të parë për nga operacionet plastike mbetet rimodelimi i hundës. Më pas vijnë operacionet që kryhen për ndryshimet në trup, si ato të gjoksit, barkut, liposuksioni, pra heqja e dhjamit, ndërhyrje për rënien nga pesha, dhe për këtë i referohem vendosjes së ballonit apo operacionit të ngushtimit të stomakut, me qëllim realizimin e asaj që dëshirojnë të gjithë njerëzit obezë, humbja e peshës”,
Mjekët estetikë thonë se grupmosha 25-45 vjeç përbën shumicën e pacientëve shqiptarë që zgjedhin të bëjnë ndërhyrje estetike. Për të huajt që vijnë në Shqipëri për të njëjtat arsye, kjo moshë shtrihet nga 55 deri në 60 vjeç. Ndërhyrjet për humbjen e peshës, si zvogëlimi i stomakut apo vendosja e balonit gastrik, kanë parë një rritje prej 30% këtë vit krahasuar me vitin e kaluar.
Turizmi estetik dhe dentar
Në Shqipëri po zhvillohet gjithashtu një formë e re turizmi, ajo e turizmit estetik dhe dentar. Për shkak të çmimeve shumë më të ulëta se në vendet perëndimore, si Italia, shumë shtetas të huaj zgjedhin Shqipërinë për të kryer procedura estetike dhe dentare. Kjo ka ndikuar pozitivisht edhe në tregun e kirurgjisë plastike, pasi pacientët shpesh kombinojnë rregullimet dentare me ndërhyrje estetike.
Rritja e interesit për këto shërbime lidhet edhe me përmirësimin e cilësisë së shërbimeve të ofruara, si dhe me një ndërgjegjësim më të madh të popullsisë për avantazhet dhe risqet që lidhen me kirurgjinë estetike. Sipas ekspertëve, kjo tendencë pritet të vazhdojë, me kërkesën për procedura estetike që do të mbetet e lartë për shumë vite në vijim.
Kirurgjia plastike në Shqipëri po shndërrohet gjithnjë e më shumë në një industri të fuqishme, e cila jo vetëm që kontribuon në rritjen e vetëbesimit të pacientëve, por edhe në zhvillimin e turizmit dhe ekonomisë vendase.
