Shkaqet e sakta të fundosjes së jahtit luksoz në Palermo mbeten një mister i pazgjidhur.
Sipas zhvillimeve të fundit, një trup i pestë, ai i manjatit të teknologjisë Mike Lynch është gjetur në një kohë që prodhuesi u jahtit fatal ka folur për një listë të gjatë gabimesh.
Mbetet e paqartë pse jahti me vela nuk u kthye në pozicionin e drejtë pas "goditjes" së turbinës së ujit si dhe pse zona e kuvertës së poshtme nuk ishte plotësisht i mbyllur kur anija u përmbys.
Giovanni Constantino, themeluesi dhe CEO i kompanisë që zotëron asetet e Perini Navi Viareggio, e cila ndërtoi Bayesian duke folur për Corriere della Sera për shkaqet e tragjedisë detare në Palermo, ai tha:
“Gjithçka që është bërë zbulon një listë shumë të gjatë gabimesh. Njerëzit nuk duhej të ishin në kabina, varka nuk duhej të ishte në spirancë. Dhe pse ekuipazhi nuk e dinte për gjendjen e turbulencës? Pasagjerët raportuan se stuhia mbërriti në mënyrë të papritur, nga hiçi. Kjo nuk është e vërtetë. Gjithçka ishte e parashikueshme. Unë kam hartat e motit pikërisht këtu para meje. Asgjë nuk erdhi papritur”. Kushtet e pafavorshme të motit ishin plotësisht të njohura në të gjitha hartat meteorologjike. Ishte e pamundur që askush të mos i njihte”.
Ndërkohë që një ekspert i shquar në industrinë e lundrimit tha se një jaht si Bayesian duhet të ishte kthyer në një pozicion të drejtë menjëherë pasi turbina u "godit".
Të mërkurën, në një takim të anëtarëve të ekipit të shpëtimit të përfshirë në kërkimin e pasagjerëve të zhdukur, zhytësit raportuan se spiranca e jahtit nuk ishte ulur plotësisht. Kjo spirancë që i jep jahtit stabilitet dhe ekuilibër gjatë lundrimit u ul në një thellësi prej 4 metrash, në vend të thellësisë së plotë prej 7.5 metrash. Është raportuar gjithashtu se zona e kuvertës së poshtme nuk ishte mbyllur plotësisht kur anija u përmbys.
Jahti luksoz u godit në orët e para të së hënës nga një turbinë uji disa qindra metra larg bregut të Porticello në Sicilinë veriore.
Manjati britanik i teknologjisë Mike Lynch ishte në mesin e gjashtë personave të zhdukur. Të enjten, zhytësit konfirmuan se trupi i tij ishte gjetur. Vajza 18-vjeçare e Lynch, Hannah Lynch, ishte në bord dhe është ende e zhdukur.
Jonathan Bloomer, kryetari i bankës së investimeve Morgan Stanley International, u konfirmua i vdekur të enjten.
Gruaja e Bloomer, Judy ishte në udhëtim me jaht me burrin e saj. Zhytësit konfirmuan se e gjetën trupin e saj të enjten.
Po ashtu edhe shefi i kuzhinës në bord të jahtit Recaldo Thomas vdiq. Trupi i tij ishte i pari që u nxor nga rrënojat.
Avokati amerikan Chris Morvillo ishte në mesin e atyre që u gjetën të vdekur të enjten. Morvillo ishte ndihmës avokat për Distriktin Jugor të Nju Jorkut midis 1995 dhe 2005 dhe punoi në hetimin terrorist për sulmet e 11 shtatorit.
Gruaja e Morvillo, Neda, vdiq së bashku me burrin e saj.57-vjeçarja kishte një markë bizhuterish luksoze, të cilën e drejtonte me emrin e saj të vajzërisë Neda Nassiri.
