Policia e Pogradecit ka reaguar sërish në lidhje me vrasjen e Egli Progës në Pogradec. Sipas tyre nuk ka pasur asnjë përpjekje për të fshehur ngjarjen kriminale, por janë marrë të gjitha masat për zbardhjen e plotë të ngjarjes.
Mirëpo, kjo bie ndesh me atë që ka ndodhur. Policia u përpoq të bindte këdo që Proga ishte i dehur dhe humbi jetën, pasi u rrëzua. Të gjitha mediat e shpërndanë kështu lajmin me burime të sigurta nga policia.
Ishin dëshmitarët që shkruan për redaksinë e JOQ Albania ata që hodhën dritë mbi ngjarjen, e cila u përpoq të mbahej e fshehtë.
Shefi i Komisariatit, Elton Halili është përgjegjësi kryesor në lidhje me këtë ngjarje, por me njoftimin e fundit nuk ka marrë asnjë përgjegjësi mbi veten.
Burime për JOQ Albania bëjnë me dije se shefi I Komisariatit me dajen e autorit janë miq të ngushtë. Daja i autorit është një emër i njohur në Pogradec, i cili ka pasur poste të rëndësishme.
Reagimi i Policisë:
Nisur nga disa lajme të publikuara në rrjete sociale në lidhje me ngjarjen e ndodhur pasditen e djeshme në Pogradec, ku si pasojë e një konflikti humbi jetën një 42-vjeçar, dhe për këtë aludohet se është tentuar të fshihet ngjarja nga Shefi i Komisariatit të Policisë Pogradec, sqarojmë opinionin publik se:
Në asnjë moment dhe në asnjë rrethanë nga asnjë punonjës i Policisë së Komisariatit të Policisë Pogradec, nuk është tentuar të manipulohet apo fshihet ngjarja.
Ngjarja është vlerësuar maksimalisht nga Strukturat e DVP Korçë dhe ato të Komisariatit Policisë Pogradec është shkuar menjëherë në vendin e ngjarjes, është ngritur Grupi hetimor, janë sekuestruar kamerat e lokalit, janë shoqëruar disa persona, që kanë qënë prezent në momentin e ngjarjes dhe janë kryer të gjitha veprimet e para në vendin e ngjarjes me qëllim zbardhjen dhe dokumentimin e saj.
Si rezultat i veprimeve profesionale të kryera nga Grupi hetimor nën drejtimin e Prokurorisë, u bë e mundur zbardhja dhe dokumentimi i ngjarjes, identifikimi, kapja dhe arrestimi i autorit dhe tre shtetasve të tjerë për moskallëzim krimi, dhe materialet procedurale janë përcjellë në Prokurori për veprime të mëtejshme.
Në përfundim të veprimeve të para hetimore që rezultuan me zbardhjen e ngjarjes dhe arrestimin e autorit të dyshuar, Drejtoria Vendore e Policisë Korçë ka dhënë njoftim zyrtar me versionin zyrtar.
Ftojmë mediat dhe këdo që është i interesuar për informacion mbi veprimtarinë e strukturave policore apo për ngjarjet e ndodhura në territorin e Qarkut Korçë, që t’i drejtohet zyrës së Komunikimit me Median e Publikun në DVP, dhe jo t’i referohen burimeve jo zyrtare.
Garantojmë qytetarët dhe median se Drejtoria Vendore e Policisë Korçë dhe strukturat në varësi të saj janë të angazhuara maksimalisht për të zbatuar ligjin dhe për të krijuar një ambient sa më të sigurt për qytetarët, pushuesit, vizitorët dhe turistët.
