Punonjësit e bashkive, patronazhistët kryesorë të partisë, do të përfitojnë rritje pagash që varion nga 20 deri në 40 për qind. Aktualisht, ata marrin një pagë mesatare prej 93 mijë lekësh, por kjo do të rritet në një minimum prej 111 mijë e 600 lekësh dhe një maksimum prej 130 mijë e 200 lekësh. Vendimi për rritjen e pagave për punonjësit e 61 bashkive u miratua në mbledhjen e Këshillit Konsultativ, Qeverisje Qendrore-Vendore.
Sipas Drejtoreshës Ekzekutive të Shoqatës për Autonomi Vendore, Adelina Farrici, kjo rritje pagash synon të balancojë pagat e specialistëve në nivel vendor me ato në nivel qendror, për të adresuar mungesën e burimeve njerëzore në shumë bashki. Farrici theksoi se shpesh ka vende vakante që nuk plotësohen për shkak të mungesës së aplikimeve.
Përveç rritjes së pagave, punonjësit e bashkive do të trajtohen njësoj si kolegët e tyre në ministri edhe në aspekte të tjera. Përllogaritja e vjetërsisë në punë do të bëhet në të njëjtën mënyrë si në nivel qendror, duke eliminuar diskriminimin ekzistues. Gjithashtu, specialistët do të trajtohen në mënyrë të barabartë, pavarësisht nga numri i popullsisë në bashkinë ku ata punojnë.
Kujtojmë se punonjësit e bashkive janë patronazhistët kryesorë të partisë socialiste, pasi të gjithë janë punësimë partiake, ndryshe nga ministritë, ku 10 përqind punësohen si ekspertë, pasi dikush duhet ta bëjë punën, ndërsa pjesa tjetër janë qoka dhe patronazhistë si ata të bashkisë.
