Prokuroria e Posaçme kundër Korrupsionit dhe Krimit të Organizuar ka nisur hetimet për çështjen e spitalit Onkologjik.
Mjekët e këtij spitali tani do të hetohen nga SPAK edhe për korrupsion, përveç, kontrabandës së ilaçeve dhe shpërdorimit të detyrës, dy vepra penale të ngritura nga Prokuroria e Tiranës.
SPAK do të bëjë një rivlerësim të masave së sigurisë për 7 të akuzuarit dhe në bazë të rezultateve të hetimit mund të rëndohet edhe pozita e mjekëve.
Gjithashtu nga ana e SPAK janë duke u verifikuar edhe disa farmaci për kontrabandë ilaçesh. Ndërsa në sitën e hetimeve pritet të kalojnë edhe zyrtarë të ministrisë së Shëndetësisë dhe drejtues të QSUT-së për çështjen e qendrës së Kobaltit.
Kujtojmë se skandali i Onkologjikut bashkë me skemën e mashtrimit dhe zhvatjes së pacientëve të sëmurë me tumor u zbulua më 26 qershor. Mjeku Edmond Gashi, koordinatori Emiljano Leka, mjekja Alketa Ymeri(Pere), zv.drejtoresha Brikena Qirjazi, Halil Gashi, Florian Marku, administrator i Flori Farma dhe Drilona Kishta u vunë nën hetim pasi në bashkëpunim me njëri-tjetrin bënin “pazar” me jetën e pacientëve.
Disa prej të akuzuarve u lanë në arrest shtëpie, ndêrsa të tjerë me detyrim paraqitje.
