Censi i vitit 2023 tregoi se në Shqipëri numri i popullsisë është në rënie të vazhdueshme krahasuar me 2011.
Një ndër shkaqet kryesore që ka kontribuar në këtë ulje të popullsisë është emigrimi masiv pasi shqiptarët për një jetë, punë dhe rrogë më të mirë po largohen gjithnjë e më shumë nga vendi.
Referuar statistikave zyrtare për numrin e popullsisë, por dhe totalin e emigrantëve, në 2023 rezulton se kanë ikur për emigrim 2.08% e popullsisë. Bazuar në numrin e anëtarëve për familje, kjo shifër do të ishte e barabartë me 15 mijë e 625 familje të larguara tërësisht nga vendi. Ndërsa çdo ditë janë larguar përfundimisht nga vendi 137 individë dhe çdo orë nga 6 qytetarë.
Censi 2023 vuri në dukje faktin se rreth 50 mijë shqiptarë largohen mesatarisht dhe kjo është shifra më e lartë e 8 viteve të fundit.
Tanimë shqiptarët nuk largohen nga vendi thjesht për një sezon apo periudhë të shkurtër disa vjeçare, por me qëllimin për të mos u kthyer më për të jetuar në atdhe.
Emigrimi i të rinjve dhe forcës punëtore është një shqetësim serioz për ekonominë por edhe demografinë e vendit. Nëse deri para pak vitesh, Shqipëria renditej te vendet me popullsinë më të re në botë, tani gjërat kanë ndryshuar pasi popullsia është plakur dhe do të plaket edhe më shumë si pasojë e emigracionit.
Sipas projeksioneve nga Organizata e Kombeve të Bashkuara, në vitin 2100 49% e popullsisë së Shqipërisë do të jetë 65 vjeç e lart, duke shënuar përqindja më të lartë në botë dhe dyfishin e mesatares globale deri në atë vit.
