Gjykata e Tiranës i ka kërkuar Gjykatës së Posaçme Kundër Korrupsionit dhe Krimit të Organizuar (GJKKO) nisjen e hetimeve për Guvernatorin e Bankës së Shqipërisë, Gent Sejko, në lidhje me çështjen e mikrokredive.
Sipas Gjykatës së Tiranës, Sejko duhet të hetohet për “shpërdorim detyre" por duke qenë se guvernatori është zyrtar i lartë, kjo gjykatë ka shpallur moskompetencë dhe ka kërkuar hetime nga ana e SPAK.
Ditën e sotme pritet të merret një vendim në lidhje me këtë kërkesën e Gjykatës së Tiranës, e cila është depozituar në Gjykatën e Posaçme.
Guvernatori Sejko dyshohet se ka marrë masa të vonuara dhe jo të duhura për të frenuar skemën e mashtrimit të mijëra qytetarëve nga shoqëria fantazmë e mikrokredive MCA. Redaksia e JOQ ALBANIA ka denoncuar në mënyrë të vazhdueshme shkeljet dhe mashtrimet kësaj shoqërie, por ndërhyrja e guvernatorit dhe masat e tij kanë qenë të vonuara dhe jo të duhura.
Një hetim administrativ i kryer nga Ministria e Drejtësisë në vitin 2020, zbuloi se rreth 17 mijë individë ishin dëmtuar me penalitete të padrejta, sekuestrim pronash si dhe shkelje të procedurave përmbarimore dhe se në skemën e mbledhjes së detyrimeve ishte përfshirë shoqëria ‘Micro Credit Albania' si dhe një grup zyrash private të përmbarimit, noterë dhe shoqëri të tjera të lidhura me të.
