“Te Iliria në Durrës plazhi publik po zhduket dita-ditës: Lokalet shtojnë çadrat, neve problemet”

Nga viti në vit, plazhi publik në Shqipëri bëhet inekzistent pasi hapësirat për qytetarët zvogëlohen gjithmonë e më shumë.

Zaptimi i plazhit publik nga oligarkët dhe të fortët që kanë lidhje e njohje me pushtetin, po sjell shumë probleme te qytetarët që kanë dëshirë të shfrytëzojnë plazhin publik.

Një qytetare e Durrësit thotë se te Iliria në lagjen 13, plazhi publik po zhduket dita-ditës nga pronarët e bareve dhe restoranteve aty pranë.

Sipas saj, pronari i një lokali në këtë zonë, që punon në Bashkinë e Durrësit, ka zaptuar edhe plazhin publik dhe nga viti në vit shton numrin e çadrave dhe shezllongjeve. Ajo thotë se para tre vitesh, para lokalit të tij ka qenë tabela që tregonte se ishte plazh publik, por vitet e fundit tabela është zhdukur fare ashtu sikurse plazhi publik për banorët e zonës, pasi janë shtuar dy rreshta me çadra.

Qytetarja thotë se gjatë verës biznesi në fjalë vendos edhe lodra për pushuesit duke bllokuar edhe më tepër pedonalen dhe reduktuar plazhin publik për qytetarët. Ky reduktim i plazhit ka sjellë probleme për banorët e zonës sepse tani nuk kanë vend ku të pushojnë ashtu siç duhet.

Banorët janë në hall pasi e dinë që përballë një të punësuari në bashki, ankesat bien në vesh të shurdhër.

Denoncimi i qytetares:

Mirmengjes, po ju shkruaj per nje problem qe na ka dale ne plazhin e Durresit. Problem qe sme duket se ka zgjidhje, por gjithsesi po e provoj. Kemi shtepine prane bar Hemingway, tek Iliria ne Durres. Ketu tri vite me pare ka qene nje plazh publik i cili kishte keto dimensione dhe nje tabele e cila shkruante "Plazh Publik". Para dy vitesh tabela u zhduk dhe u shtuan dy rreshta shezllonash nga bar Hemingway pas asnje pike turpi apo sqarimi. Ne jemi shume njerez qe kemi shtepite ketu dhe filluan ehde problemet mes nesh se rrinim si sardelet.

Problemi me pronarin e ketij bari eshte se ky zoteri punon ne bashkine e Durresit dhe e dijne te gjithe qe lodhesh kot te ngresh zerin apo te flasesh se bie ne vesh te shurdher. Vjet qe u be edhe pedonalja, mire qe ishte ngushtuar serish me nje rresht tjeter shezllonash, po na u shtua edhe nje goxha kamion me lodra i cili hengri vend nga cadrat tona. Erdhi policia bashkiake nja dy here bene si te forte me ate qe e kishte dhe u mbyll me aq. Kur them lodra e kam per ato kamionet qe hapen anash dhe gjuajne me cifte e pistoleta dhe fitojne pellusha Dhe ne krah vendosin motorra me xhetona E tavolina kalcetoje

Kete vit ishin shtuar serish shezllona dhe mes ne, banoreve ka plasur sherri sepse hapsira gjoja publike eshte reduktuar ne kaq. Ku te denoncojme ne? Dhe si ta zgjidhim e denoncojme kete zoteri qe ka dyfishuar biznesin e vet dhe nuk i hyn gjemb ne kembe?