Shoferi i mjetit tip "BMW" që u përfshi në aksidentin tragjik me 4 viktima dhe 2 të plagosur në Tepelenë, është arrestuar.
Policia e akuzon 46-vjeçarin me iniciale E.P Për veprën penale “Shkelja e rregullave të qarkullimit rrugor”. 46-vjeçari mbeti i plagosur lehtë nga ky aksident bashkë me dy pasagjerët që po udhëtonin me të.
Ndërkohë si pasojë e këtij aksidenti ka humbur jetën 42-vjeçari Riza Rrapaj, Lavdosh dhe Leferi Begaj (burrë e grua) dhe Afërdita Begaj, nëna e tij. Të plagosur rëndë ka mbetur edhe çifti i bashkëshortëve, Jani dhe Lavdie Meta, që po udhëtonin me familjen Begaj.
Njoftimi i policisë:
“Në vijim të veprimeve procedurale për aksidentin e ndodhur pasditen e djeshme, në aksin rrugor Tepelenë-Memaliaj, si pasojë e të cilit humbën jetën 4 shtetas dhe u dëmtuan rëndë 2 të tjerë, specialistët për Trafikun Urban dhe Interurban arrestuan në flagrancë drejtuesin e automjetit tip “BMW” të përfshirë në këtë aksident, shtetasin E. P., 46 vjeç, banues në Gjirokastër, për veprën penale “Shkelja e rregullave të qarkullimit rrugor””.
