Antonio Daja është 19-vjeçari shqiptar që një ditë më parë humbi jetën në një aksident tragjik në Menidi, Greqi.
I riu shqiptar, me origjinë nga Vau i Dejës ishte nisur për në punë bashkë me shokun e tij kur u përplasën nga një makinë që drejtohej nga këngëtari i njohur grek, Janis Xanthopoulos.
Miqtë e 19-vjeçarit kanë lënë një lule dhe foton e tij në vendin e aksidentit, ndërsa ende nuk mund ta besojnë që 19-vjeçari ka humbur jetën në atë rrugë. Në të njëjtën kohë, drejtuesi 20-vjeçar i mjetit në të cilin udhëtonte 19-vjeçari, është në gjendje të rëndë në spital, ndërsa Yannis Xanthopoulos, edhe pse i plagosur lehtë, iu nënshtrua analizave për të përcaktuar nëse ai ka pësuar ndonjë tronditje.
Aksidenti rrugor ka ndodhur kur këngëtari 24-vjeçar, duke drejtuar makinën e tij "Ford" në rrugën Dekelia, në drejtim të Menidit, ka humbur kontrollin e mjetit, ka kaluar në korsinë përballë dhe është përplasur kokë më kokë me makinën e dy të rinjve. Sipas mediave greke, në aksident dyshohet se është përfshirë një mjet i tretë, drejtuesi i të cilit kishte ndezur STOP-in përpara se Yannis Xanthopoulos të bënte manovrën fatale.
Makina e të rinjve, të cilët ishin nisur për në kantinën ku punonin, është përplasur me një shtyllë ndriçimi.
