Një 19-vjeçar është rrëmbyer në Rrëshen me qëllim grabitjen e parave që ai kishte me vete.
Ngjarja ka ndodhur mbrëmjen e kaluar dhe dy autorët e kësaj ngjarje janë Mateo Brozi 20 vjeç, banues në Rrëshen dhe Ergys Tusha 19 vjeç, banues në Durrës. Ata kanë rrëmbyer 19-vjeçarin me makinë dhe më pas e kanë dërguar në garazhin e një pallati ku e kanë mbajtur peng për disa minuta.
Pasi i kanë marrë paratë, 220 000 lekë, të rinjtë e kanë hedhur në rrugë 19-vjeçarin. Pas kësaj ai ka bërë denoncim dhe policia ka arrestuar dy të rinjtë dhe iu ka sekuestruar paratë e vjedhura dhe makinën "Audi A4" e cila u përdor për rrëmbimin.
Njoftimi i policisë:
Mirditë/Finalizohet operacioni policor i koduar “Telefonata”. Operacioni, rezultat i reagimit të menjëhershëm të shërbimeve të Komisariatit të Policisë Mirditë, për kallëzimin e një 19-vjeçari.
Morën me forcë, në automjet, një 19-vjeçar dhe e mbajtën në garazhin e një pallati, për t’i vjedhur paratë, arrestohen 2 shtetas.
Sekuestrohen shuma 220 000 lekë që të arrestuarit synonin t’i vidhnin 19-vjeçarit, automjeti i përdorur nga ata dhe 2 celularë. nMenjëherë pas kallëzimit të një shtetasi 19 vjeç, se ishte marrë me forcë në automjet, nga 2 shtetas të tjerë, të cilët për t’i marrë paratë, e kishin mbajtur për disa minuta, kundër vullnetit të tij, në garazhin e mbyllur të një pallati në Rrëshen, dhe më pas e kishin lënë në rrugë, shërbimet e Komisariatit të Policisë Mirditë organizuan punën për të identifikuar dhe arrestuar përgjegjësit.
Si rezultat, në kuadër të operacionit policor të koduar “Telefonata”, shërbimet e Policisë bënë të mundur identifikimin dhe arrestimin e menjëhershëm të autorëve të dyshuar të rastit, shtetasve M. B., 20 vjeç, banues në Rrëshen dhe E. T., 19 vjeç, banues në Durrës. Gjithashtu, u bë e mundur gjetja e shumës së parave të vjedhura me dhunë, 220 000 lekë, e cila u sekuestrua bashkë me automjetin tip “Audi A4”, me të cilin u mor me forcë 19-vjeçari, dhe me 2 celularët e të arrestuarve.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme, për veprat penale “Heqja e paligjshme e lirisë” dhe “Vjedhja me dhunë”, të kryera në bashkëpunim.
