Një vajzë shtatëvjeçare ka vdekur pasi një gomone e vogël që po përpiqej të arrinte në Kanalin Anglez u përmbys në Francën veriore.
Zyrtarët thanë se gomonia mbante 16 emigrantë kur u mbyt disa kilometra larg brigjeve të Dunkirk. Sipas tyre gomonia "nuk kishte përmasat e duhura për të transportuar kaq shumë njerëz".
Prindërit e vajzës, të cilët po udhëtonin me tre fëmijë të tjerë, u dërguan në një spital në Dunkirk.
Autoriteti lokal Préfet du Nord tha se policia dhe zjarrfikësit u lajmëruan për varkën e përmbysur nga një qytetar. Ka dyshime se gomonia ishte e vjedhur dhe nuk ishte mjaft e madhe për numrin e njerëzve në bord.
"Një çift, origjina e të cilëve po përcaktohet, me katër fëmijët e tyre, përfshirë nënën që është shtatzënë, ishin në bord. Vajza e vogël e çiftit, 7 vjeçe, vdiq nga mbytja”.
Préfet du Nord tha se dy burra dhe gjashtë fëmijë të vegjël u dërguan në spital, por gjendja e tyre nuk ishte kërcënuese për jetën. Prokurorët në Dunkirk thanë gjithashtu se "disa persona janë në paraburgim" për incidentin.
