Komuniteti i Naves, në Itali, mban zi për ndarjen nga jeta të shqiptarit Markeliano Aniajt, i cili vdiq në moshën 25-vjeçare.
Mediat italiane raportojnë se i riu shqiptar ndërroi jetë në shtratin e spitalit, pasi qëndroi në koma për disa ditë për shkak të komplikimeve që nuk lidhen drejtpërdrejt me sëmundjen e tij, me të cilën po luftonte prej disa kohësh.
I gjithë komuniteti, i prekur thellë nga ngjarja e rëndë, u mblodhën rreth familjes së Markelianos, me origjinë shqiptare, por banuese në qytet prej mbi 20 vitesh. I riu shqiptar mbahet mend nga të gjithë si një person i lumtur dhe gjithmonë i sjellshëm me të gjithë.
Mesazhet ngushëlluese për të riun shqiptar janë të shumta:
"Një jetë e re që ikën është gjithmonë dhimbje për të gjithë", "Lamtumirë engjëll i vogël, pushofsh në paqe. Na mbro nga atje lart...”, “Një djalë shumë i ëmbël dhe fatkeq. Po më qan zemra”.
Ceremonia mortore e shqiptarit do të bëhet nesër, e mërkurë 10 janar, në kishën famullitare të Maria Immacolata në Nave.
