Ditën e djeshme disa kompani farmaceutike në vendin tonë, ku bëjnë pjesë edhe farmacia “Ditë Natë” dhe “Delta Farma” kanë qenë në “shënjestër” të SPAK.
Bëhet e ditur se SPAK ka kryer kontrolle teksa hetimi po udhëhiqet nga prokurorja Elida Kaçkini.
Nisma vjen pas hetimit pasuror që po bëhet për ish-ministrin Ilir Beqaj. Nga informacionet e deritanishme, dyshohet se ky kontroll lidhet me hetimet që po kryhen për ‘Check-up’-in.
Kujtojmë që kompania koncensionare për ‘Check-up’-in, “3P Life Logistic”, mori përgjegjësi të menaxhojë 20 laboratorë, duke i pajisur me aparaturat e duhura, implementim që nisi më 31 mars 2015.
Sjellim në vëmendje se SPAK ka ngritur akuza ndaj Beqajt për shpërdorim detyre për koncesionin e sterilizimit, ndaj Prokuroria e Posaçme zyrtarizoi hetimin për ish-ministrin e Shëndetësisë, Ilir Beqaj, lidhur me koncesionin e sterilizimit të pajisjeve kirurgjikale, kontrata koncesionare 10-vjeçare afro 100 milionë dollarëshe, e cila u firmos në dhjetor 2015 dhe ende vijon.
