Detaje të reja janë zbardhur në lidhje me ngjarjen tragjike të ndodhur në Dibër ku një 13-vjeçar u gjet i mbytur në liqen.
Pasditen e djeshme, i mituri me iniciale E.S ka qenë duke kullotur bagëtitë kur ka humbur kontaktet me familjarët. Këta të fundit bashkë me ndihmën e banorëve kanë nisur kërkimet në fshatin Shumbat, por pa sukses.
Rreth orës 19:30 Ardi Sulejmani, xhaxhai i 13 vjeçarit ka njoftuar policinë për zhdukjen e tij dhe kanë nisur sërish kërkimet. Pas më shumë se 3 orësh trupi i pajetë i 13-vjeçarit është gjetur në liqenin i cili ndodhet rreth 300 metra sipër fshatit.
Ka dyshime se i mituri ka pësuar infarkt kur është futur për t'u larë në ujin e ftohtë. Ka qenë një çift gjermanësh që iu ka treguar familjarëve dhe banorëve të zonës se rreth orës 17:00 kanë parë një djalë që po lahej në liqen.
Shapkat e 13-vjeçarit janë gjetur te diga e liqenit dhe kaq ka mjaftuar që kërkimet të zhvendoseshin në liqen aty ku u gjet edhe trupi i pajetë.
