Ditën e djeshme policia greke arrestoi Laert Haxhiun pasi ishte shpallur në kërkim ndërkombëtar nga INTERPOL për masakrën e Lushnjes në vitin 2017.
Në momentin e arrestimit, Haxhiu ka qenë nën shoqërinë e dy shtetasve shqiptarë, 35-vjeçarit Juxhin Barjami nga Delvina dhe një 22-vjeçari.
Ky 22-vjeçar rezulton të jetë shtetasi Firdeus Berberi i shpallur në kërkim për plagosjen me armë zjarri të 22-vjeçarit Joan Muçllari në Pogradec. 22 prillin e kaluar, Berberi në bashkëpunim me shokun e tij Greisi Maxhari e kanë ngacmuar 22-vjeçarin Muçllari dhe më pas e kanë goditur me thikë në kokë dhe armë zjarri në këmbë. Pas kësaj ata janë larguar nga vendi i ngjarjes me një mjet tip "Golf".
Gjatë gjithë kësaj kohe, Berberi qëndronte ilegalisht në Janinë dhe shoqërohej me të shumëkërkuarin Laert Haxhiu. Vlen të thuhet se 22-vjeçari Berberi cilësohet si djali i ‘të fortit’ të Pogradecit. Babai i Firdeus Berberit është shtetasi Ilir Berberi, një person me rrezikshmëri të lartë shoqërore dhe një emër i njohur për policinë. Ai ka qenë i dënuar për gjobëvënie, vjedhje dhe armëmbajtje pa leje.
