Një ngjarje e dhimbshme ka ndodhur mbrëmë në qytetin e Pejës, ku një person është gjetur pa shenja jete.
Ekipi mjekësor nga Emergjencës kanë bërë me dije se kanë pranuar thirrje për ndihmë, për shkak se një person ishte i shtrirë pa ndjenja në Rrugën e Kforit dhe dyshohej se ishte në rrezik për jetën.
Ekipi mjekësor i Emergjencës ka dalë menjëherë në vendin e ngjarjes, ku kanë gjetur viktimën të shtrirë afër një veture dhe pas ekzaminimeve për shenjat vitale, mjeku ka konstatuar se ai ka ndërruar jetë.
Lidhur me rastin është njoftuar edhe Policia e Kosovës -Rajoni Pejë të cilët kanë dalë në vendin e ngjarjes për të kryer ekzaminimet e nevojshme që ndihmojnë në zbardhjen e rrethanave të rastit.
Me urdhër të prokurorit, rasti është cilësuar ‘Hetim i vdekjes’ dhe trupi i pajetë i viktimës është dërguar në Institutin e Mjekësisë Ligjore për obduksion.
Policia Rajonale e Pejës, nëpërmjet zëdhënësit të saj toger Fadil Gashi, kanë konfirmuar sot se viktima e mbrëmshme është Kujtim Berisha nga Peja, 59-vjeçar.
Ndërsa familja e të ndjerit ka hapur dyert e mortit dhe ka njoftuar se ceremonia mortore për të do zhvillohet sot (e Enjtë) në ora 14:00 në Pejë.
