Pamjet i përkasin një rruge të vitit 2023, në lagjen Elezaj në Domje të Bashkisë Vorë. Ndonëse ka 30 vite që ndodhet në gjendje të degraduar, asnjë kryetar Bashkie nuk ka marrë masa për ta shtruar.
Me gropa, baltë dhe si në mesjetë, rruga ende nuk ka marrë asnjë zgjidhje konkrete. Sot kamera e JOQ Albania shkoi në lagjen në fjalë, aty ku banorët e indinjuar u shprehën për mikrofonin tonë se rruga ka shumë vite që shkakton dëme të mëdha për automjetet duke u kthyer në shqetësim për vetë ata.
Një banor i zonës deklaroi se rruga është kthyer në shqetësim për të madh e të vogël, sidomos në ditë me shi. Ndonëse sipas banori shtrimi është premtuar disa herë, në të vërtetë gjendja e rrugës sa vjen dhe përkeqësohet.
Banori:
30 vjet ka kështu. Të gjitha i kemi bërë vetë, kanalizime e të gjitha. Na kanë premtuar, ka qenë edhe ministrja Elisa Spiropali para 4 vitesh. Një pjesë e prindërve i dërgojnë fëmijët në shkollë me makinë, ata që kanë mundësi. I kam than kryetarit të Bashkisë Vorë ta shohë nga afër rrugën, nuk është problem vetëm rruga, por edhe kanalizimet, por askush nuk e vë ujin në zjarr.
Një tjetër banor u shpreh se Shqipëria është copë-copë dhe se rruga ku kalon çdo ditë i ka shkaktuar dëme në mjet, pasi i duhet ta dërgojë shumë shpesh në servis.
Banori:
Tani kam ardhur në këtë zonë. E kanë pastruar njëherë edhe kanë ardhur dhe e kanë nxjerrë, e kanë heq fare se kanë dalë hekurat. Copë-copë, Shqipëria nuk bëhet. Tani po ik te servisi, na i ka prish makinat. Fëmijët i hipim në makinë se në këmbë nuk ecin. Në këmbë hupi unë si jam i madh. Duan vetëm votën, nuk u vjen ndërmend ta rregullojnë rrugën.
Një qytetar tjetër shprehet se ne lagje ka edhe probleme me kanalizimet, teksa për rrugën kërkon qe te rregullohet pasi dhe fëmijët e kane te vështirë te dalin ne mëngjes te shkojnë ne shkolle pa praninë e prindërve.
Banori:
Erdhën hoqën betoni, nuk e shtruan më dhe ngeli kështu. Premtime ka, por gjë nuk po bëjnë. Jemi mbledh kemi bërë kërkesë, na kanë premtuar por nuk e kanë shtruar ende rrugën.
Pas këtyre pamjeve, është e rëndësishme që autoritetet lokale të marrin masa për të riparuar rrugën në fjalë sa më shpejtë të jetë e mundur. Banorët i kërkojnë kryetarit të Bashkisë Vorë, Blerim Sherës që të kthejë sytë nga banorët e lagjes Elezaj në Domje dhe të shtrojë rrugën në fjalë.
