Me propozim të Komitetit për negociata për ndërtimin e Korridorit 8 dhe 10 D, Qeveria e miratoi marrëveshjen për ndërtimin e katër seksioneve të planifikuara në autostradë në këto korridore, informoi Kabineti i zëvendëskryeministrit, Artan Grubi.
Miratimi i kontratës për ndërtimin e Korridorit 8 dhe 10D vjen pas katër javëve negociata të cilat janë realizuar në mes të konsulentit për transaksion financiar të Qeverisë, IRD dhe konzorciumit ndërkombëtar “Behtel dhe Enka”.
“Ditë e madhe sot në Komitetin drejtues dhe në Qeveri ku shqyrtuam raportin e konsulentit tonë mbi negociatat me konzorciumin Behtel Enka për ndërtimin e Korridorit 8 dhe 10-D si dhe miratim përmbajtjen dhe nënshkrimin e kontratës”, është shprehur Grubi.
Qeveria javë më parë miratoi konkluzionin e propozuar nga Komiteti për negociata, se ishin plotësuar të gjitha parakushtet për fillimin e negociatave dhe formimin e grupeve të punës mes Behtel Enka dhe IRD, negociata të cilat zgjatën 28 ditë.
“Korridori 8 shtrihet në gjatësi prej 68 kilometra, me autostradë me gjashtë korsi, nga Tetova në Gostivar, Kërçovë, përmes Strugës deri në Qafë Thanë, ndërsa Korridori 10-D nga Prilepi në Manastir shtrihet në gjatësi prej 40 kilometra dhe realizohet me gjashtë korsi, në periudhë prej tre viteve nga fillimi i punimeve. Realizimi i këtij investimi më të madh kapital në historinë e vendit tonë do të kontribuojë në ekonominë, modernizimin e infrastrukturës rrugore, e cila në të ardhmen do të mundësojë zhvillim shtesë të shërbimeve, kushte më të mira për zhvillimin e biznesit, por edhe jetë cilësore dhe lidhje me fqinjët dhe korridoret ndërkombëtare”, qëndron në informacionin e Ministrisë për Sistem Politik dhe Marrëdhënie ndërmjet Bashkësive.
Qeveria vitin e kaluar nënshkroi memorandum për bashkëpunim me “Behtel dhe Enka”, ndërsa Kuvendi miratoi Ligjin për përcaktimin e interesit publik dhe nominimin e tij për partner strategjik për këtë projekt.
Më 2 shkurt në Qeveri u nënshkrua marrëveshje me IRD italiane për mbikëqyrje dhe këshilltarin juridik për katër akset e autostradave në gjatësi prej mbi 120 kilometra në korridoret 8 dhe 10 D. Duhet të ndërtohen akset në autostradë të Korridorit 8: Trebenishtë – Strugë – Qafë Thanë (22,5 kilometra), Gostivar – Bukojçan (30,1 kilometra), Tetovë – Gostivar (27 kilometra) dhe në seksioni Prilep – Manastir (43,4 kilometra) nga Korridori 10- d.
Drejtori i IRD inxhiniering, Paolo Orsini në nënshkrimin e marrëveshjes premtoi se do të sigurojnë nivelin më të lartë të shërbimeve mbikëqyrëse dhe se me kohë dhe me cilësi do të përfundojnë punët.
Javën e kaluar kishte njoftime në media rreth kompanive të përfshira në mbikëqyrjen e zgjedhur për projektin, ndërsa kryeministri Dimitar Kovaçevski porositi që të raportohet çdo lloj dyshimi ose informacioni në lidhje me integritetin e të punësuarve, nënrealizues, subkontraktorë… të përfshirë në projektin infrastrukturor.
